ОД 1 СЕПТЕМВРИ ТРГНУВА ГРАДСКИОТ ВОЗ СКОПЈЕ-ЗЕЛЕНИКОВО Објавен е возниот ред, по 8 поаѓања дневно

Од 1 септември 2026 година повторно ќе биде достапна железничката врска меѓу Зелениково и Скопје, со градски воз кој ќе сообраќа осум пати дневно во двата правца.

Возот од Зелениково ќе застанува на станиците Зелениково, Зелениково Ново, Орешани, Јане Сандански, Драчево и Лисиче, а крајна станица ќе биде Железничката станица Скопје.

Првиот воз од Железничката станица кон Зелениково ќе тргнува во 5:32 часот. Следните поаѓања се во: 7:30 часот, 11:40 часот, 13:20 часот, 15:42 часот, 17:45 часот, 19:12 часот и во 20:56 часот.

Во спротивна насока, од Зелениково возот ќе тргнува во 6:20 часот, а потоа ќе има поаѓања во: 8:30 часот, 12:26 часот, 14:00 часот, 16:25 часот, 18:30 часот, 20:12 часот и во 21:55 часот.

Патувањето од Зелениково до Скопје ќе трае меѓу 24 и 28 минути, зависно од поаѓањето. Патувањето од Скопје до Зелениково ќе трае меѓу 24 и 26 минути.

Возниот ред ќе важи од 1 септември до 31 декември 2026 година.

Новата железничка врска е особено значајна за жителите на Зелениково, Орешани, Драчево, Лисиче и околните населени места кои секојдневно патуваат кон Скопје. Возниот ред треба да биде усогласен со работното време, училиштата и останатиот јавен превоз во Скопје, бидејќи токму поврзаноста на железницата со градскиот транспорт ќе одреди колку практична ќе биде оваа линија во секојдневието.