Народот е ага, о Али море!

Во едно се согласивме со Ахмети!

Имено, и јас не прифаќам Македонците да се аги, Албанците слуги. Не прифаќам ни Албанците да се аги, Македонците да се слуги. Ниту Ромите да се аги, а Турците слуги или пак – Србите да се аги, а Бошњаците и Власите слуги.

Робовладетелското општество е отфрлено од цивилизацијата одамна. Крахот на нашиот систем се случи поради партитократија, наместо меритократија. И бидејќи во довчерашните партии на власт, лидерството беа аги, а гласачите слуги, на кои ќе им фрлеа по некоја коска после обилниот ручек, што административна (вработување), што емотивна (вакви глупи муабети, како твојот).

Рамноправност е кога никој нема да е привилегиран ни поради боја на кожа, ни поради боја на книшка, ни поради боја на очи, број на кондури, место на раѓање и Бог во кој може, но и не мора да верува.

Не е рамноправност кога ќе уцениш лешпери дека ќе излезеш од владата во која прават криминал, барабар со тебе, ако не ги прифатат уцените од недобромислечките кон Македонија соседи – и спротивно на волјата на државнотворниот народ во Македонија, македонскиот.

Зошто? За да бидете добри слуги, на стратешките аги.

Да, во вашата власт, Али, имаше аги и слуги – та, вие бевте агите, комуњарите беа слугите. Жртви беа сите граѓани, особено Македонците, имајќи ја предвид распродажбата на националните интереси во која слугите од Бихачка ги слушаа агите од Речица, дека сите заедно треба да се слуги на агите во Софија, за да бидат аги на тендерите, додека народот го третираат како слуга.

Демократијата во принцип подразбира, меѓу другото, и политиката да му „слугува“ на народот. Граѓаните да се агите. А избраните, со задоволство да слугуваат. Не поради тендери и привилегии, туку поради високи морални вредности и желба да се придонесе за општото добро.

Вели Али Ахмети:

„Упатувам порака, без оглед на политичката чистка и бурите што ги прават, дека ДУИ е ураган!“

ДУИ беше ураган. Ураганот помина. Сега ДУИ е опозиција. Од опозиција може да проба пак да биде ураган. Односно, да преиспита некои свои релации, во кои се поставиле како задоволни слуги, на други аги.

Но, овојпат, (сè уште, барем декларативно), хвалоспеваните аги мислам дека со неволност ќе ја примат пораката дека некои „слуги“ посакале да станат поголеми аги од агите.

Од курч на курч, минимум до потерница се доаѓа. Делеше бисквити, ќе влегуваше во Европа, ако не во влада – на крај остана сам да ја сркаш попарата. И ко да бараш уште, и покрај таа која ти ја сервираа од твојата омилена кујна…

Народот е ага, Али, и тој одбра.

Секој обид да се суспендира демократијата, да се суспендира уставниот поредок, како што е обидот да се суспендира работењето на Уставниот суд, очекувам да биде пресретнат и неутрализиран од оние кои одбрале и оние кои сме ги одбрале да служат на сите граѓани.

Нема народот да биде слуга на ничии акутни психички пореметувања и на проектирање на свет во кој ако не одлучува „како и досега“, ќе има потоп.

Нема да има. Но, ќе има одговорност.

Нема нашите животи да ги поминеме слугувајќи на фрустрациите на самопрогласените доживотни аги.

(Фејсбук статус на авторот. Насловот е редакциски.)