МИЛИОНЕРОТ БРАЈАН ЏОНСОН ТВРДИ ДЕКА СЕ КЛОНИРАЛ „Тукушто се клонирав… како новороденче“

Американскиот милионер Брајан Џонсон тврди дека во лабораторија создал сопствен „клон“ во форма на новороденче. Сепак, она што го опишува не е вистинско клонирање на човек, туку научен експеримент со клетки добиени од неговото тело.

Според Џонсон, ваквата технологија еден ден би можела да помогне во обновување на оштетени органи, развој на нови терапии и забавување на процесот на стареење.

Неговата објава доаѓа само неколку дена откако откри дека му била дијагностицирана хронична болест на желудникот.

„Бебето Брајан“ засега живее во лабораторија

Во објава на платформата Икс, Џонсон напиша:

– Тукушто се клонирав… како новороденче.

Но веднаш појасни дека не станува збор за вистински клон, туку за клетки создадени од неговата крв.

– Ова ‘бебе Брајан‘ засега живее во Петријева чинија – напиша тој, додавајќи дека некои луѓе ваквата технологија ќе ја доживеат како сцена од дистописка иднина, додека други ќе ја гледаат како иднина на медицината.

I just cloned myself…as a newborn

With this clone, I can:

+ become my own blood boy
+ test therapies on the clone
+ grow organs for transplantation
+ develop new treatments
+ inject young cells

This baby-bryan lives in a petri dish for now.

This may be scary to some… pic.twitter.com/Ved8ij9Col

— Bryan Johnson (@bryan_johnson) July 21, 2026

Што всушност направил?

Џонсон објасни дека од неговата крв биле издвоени клетки кои потоа биле третирани со таканаречените Јаманака фактори – молекули што можат да ги вратат зрелите клетки во состојба слична на матичните клетки.

Иако тој ги нарекува свој „клон“, научниците ваквите клетки ги опишуваат како индуцирани плурипотентни матични клетки (iPSC). Во лабораториски услови тие можат да се развијат во различни видови клетки, поради што се сметаат за едно од најперспективните подрачја на регенеративната медицина.

Џонсон верува дека во иднина оваа технологија би можела да се користи за обновување на оштетени клетки на кожата, црниот дроб, бубрезите или нервниот систем.

– Како што клетките стареат, во нив се натрупуваат промени што можат да доведат до послабо функционирање и болести. Оваа технологија отвора можност да истражиме како во дел од тие процеси би можел да се направи пресврт – напиша тој.

Неизлечивата болест како поттик

Милионерот откри дека дополнителна мотивација за овие истражувања му била неодамнешната дијагноза на автоимун гастритис.

– Спомнав дека дијагнозата на неизлечива болест е една од најдобрите работи што ми се случиле во последно време. Ми отвори нов начин на размислување за тоа како да го поправам и зајакнам телото – изјави Џонсон.

Претходно овој месец тој соопшти дека официјално му е потврден автоимун гастритис – состојба при која имунолошкиот систем го напаѓа сопствениот желудник.

Ова заболување може да доведе до оштетување на желудочната слузница и проблеми со апсорпцијата на одредени витамини, а симптомите често се појавуваат дури по подолг временски период.

Милиони долари за побавно стареење

Брајан Џонсон е познат по својот проект Blueprint, преку кој инвестира милиони долари во обиди да го забави биолошкото стареење и што подолго да ги зачува функциите на организмот.

Неговата рутина вклучува строго контролирана исхрана, бројни медицински тестирања и различни експериментални третмани.

I had low iron for 11 years.

Yes, even when I ate meat, my ferritin was low and averaged 38 ng/mL.

I’ve finally boosted it back to healthy levels. You can see my protocol below.

On the surface, my low ferritin was easy to dismiss by most standards of care. Most doctors miss… pic.twitter.com/lgsvoiqbJk

— Bryan Johnson (@bryan_johnson) July 7, 2026

Во минатото привлече големо внимание со трансфузија на крв од својот син, користење псилоцибински печурки и строго организиран дневен режим што започнува уште во 4:30 часот наутро.