Мицкоски: Во Штип на следните градоначалнички избори се брани Македонија
Лидерот на ВМРО-ДПМНЕ забележа дека за четири години нема инвестиција во Штип, ниту се зачувало тоа што е изградено.
Четири 4 години нема ниту една нова инвестиција во Штип, на времето се градеа Универзитети, фабрики и патишта, сега не можат ни тоа да го зачуваат, а не пак да изградат ново, изјави лидерот на ВМРО-ДПМНЕ Христијан Мицкоски во Штип каде што денеска партијата протестираше против неправдите.
– Во минатото бевме навикнати на успеси на проекти, нови фабрики, универзитети, луѓе коишто беа среќни и коишто беа задоволни од секојдневието. Но, за жал денеска ние не можеме 4 години веќе да се пофалиме, дури не можеме ни да го одвоиме тоа што на времето беше изградено за Штип, да го зачуваме и тоа да го надградиме, а камо ли да зборуваме за нешто што е ново изградено, некој нов пат некоја нова улица, некоја нова фабрика. Напротив, гледаме како фабриките се затвараат, луѓето се разочарани а за жал се помалку има студенти, се помалку има штипјани во Штип. Својот леб, лебот за сопственото семејство го бараат надвор од Штип, надвор од Македонија – рече Мицкоски.
Тој ги повика штипјани да излезат на гласање на предвремените градоначалничлки избори и да гласаат за кандидатот на ВМРО-ДПМНЕ.
– Во Штип на следните градоначалнички избори се брани Македонија, тоа не се обични избори и затоа ги повикувам штипјани да излезат и заедно во првите редови да ја одбраниме Македонија од ова денешно секојдневие кое што и се случува, секојдневие на пљачка, криминал, корупција, понижувања и омаловажувања.Да победат проектите, да победи новата иднина, вистинската иднина, и за Штип и за Македонија – рече Мицкоски.