МАКЕДОНЦИТЕ ПОКАЖАА ХУМАНОСТ Собрани 112,5 милиони денари за Кочани, Црвениот крст веќе исплати 60,8 милиони
Организацијата нагласи дека покрај финансиската помош, продолжува со обезбедување психосоцијална и друга поддршка за погоденото население.
Во хуманитарниот апел на Црвениот крст на Република Македонија за настраданите од пожарот во Кочани досега се собрани 112.595.482 денари. Од овие средства, веќе се извршени две исплати кон семејствата на жртвите и повредените, во вкупен износ од 60.850.000 денари.
„Нашата примарна цел е обезбедување брза и ефикасна поддршка за настраданите семејства. Веќе реализиравме две исплати – првата кон семејствата на починатите и повредените кои се лекуваат во земјата и странство, а денес ја завршивме и втората исплата. Дополнително, заедно со Владата и релевантните институции работиме на модел за распределба на остатокот од донациите, со цел тие да стигнат навремено и на вистинските места“, истакнаа од Црвениот крст.
Организацијата нагласи дека покрај финансиската помош, продолжува со обезбедување психосоцијална и друга поддршка за погоденото население. Поради големиот интерес за донирање, апелот останува отворен, а од Црвениот крст упатија голема благодарност до сите кои досега помогнале.