Мафијашот кој уби судија излезе од затвор по 25 години

Сицилијанскиот мафијаш Џовани Бруска, човекот кој ја активираше бомбата во која беше убиен судијата Џовани Фалконе во 1992 година, е ослободен од затвор откако издржа 25-годишна казна, предизвикувајќи тага и гнев кај роднините на оние што ги уби и шок во Италија.

Бруска (64) беше уапсен во 1996 година, четири години по нападот близу Палермо во кој беа убиени Фалконе, неговата сопруга и тројца полицајци. Откако стана соработник на правдата, тој им помогна на обвинителите во борбата против клановите на Коза ностра. Бруска беше еден од најблиските соработници на познатиот мафијашки бос Тото Риина.

Убиството на Фалконе, а два месеци подоцна и убиството на неговиот колега против мафијата, Паоло Борселино, беше една од најпознатите озлогласени епизоди во долгата и насилна борба на Италија против организираниот криминал.

Бруска, познат како „убиец на луѓе“, ја призна својата улога во над 100 убиства, вклучително и смртта на 14-годишното момче, Џузепе ди Матео, кој беше убиен и растворен во киселина затоа што беше син на информатор за мафија.