Лекот „Фавира“ веќе го има во аптеките, една кутија чини 5.100 денари
Лекот е пуштен во малопродажба пред неколку дена и е одобрен увоз за сите заинтересирани субјекти, вели за Плусинфо директорот на Агенцијата за лекови, Лирим Шабани.
Лекот „Фавира“ (Фавипиравир), кој помага при лекување на ковид-19 во раната фаза на болеста, веќе се наоѓа во малопродажба и во Македонија. Оваа информација за Плусинфо ја потврди Лирим Шабани, директор на Агенцијата за лекови.
Според информации од пациенти, во аптеката на Клиничката болница „Аџибадем Систина“, едно пакување од лекот „Фавира“ содржи 40 таблети и се продава по цена од 5.100 денари.
Лекот се издава само на лекарски рецепт.
Пациенти јавуваат дека го бараат лекот и во други аптеки во Скопје и во земјава.
– Лекот е пуштен во малопродажба пред неколку дена и е одобрен увоз за сите заинтересирани субјекти. Лекот го има, а ќе го има и во иднина, бидејќи ќе можат да го увезуваат сите што се заинтересирани. Како што ви е познато, во нашиот здравствен систем цените на лековите се утврдуваат од посебно тело на Министерството за здравство и се единствени во сите аптеки – објаснува директорот Шабани.