ХРВАТИТЕ НАЈОШТЕТЕНИ ОД ОДЛУКИТЕ НА СУДИИТЕ НА СП 2026? Најголем број ВАР-одлуки биле на нивна штета

Мундијалот останува во сенка на бројни контроверзии поврзани со судењето и ВАР-технологијата. Голот по ударот на топката во кабелот од камерата на мечот Англија – Норвешка, поништениот погодок на Хрватска поради косата на Игор Матановиќ, како и неколку други спорни ситуации, отворија сериозна дебата за критериумите на судиите.

Анализата на дури 97 натпревари покажува дека судиите 35 пати интервенирале по ВАР-преглед за ситуации поврзани со прекршоци, што е значително повеќе во однос на претходните мундијали. Во Катар 2022 имаше 26 вакви интервенции, а во Русија 2018, кога ВАР за првпат беше воведен, само 22.

Највпечатлив е податокот дека Хрватска има убедливо најмногу ВАР-одлуки на своја штета – дури 6,5 интервенции на секои 100 прекршоци, со што „коцкестите“ се на самиот врв на негативната листа. Зад нив следуваат Иран со 5,4 и Катар со 5,1. Од друга страна, најголеми добитници според статистиката се Мексико, кој имал 7,1 ВАР-одлука во своја корист на секои 100 прекршоци, и Аргентина со 6,7.

Ваквите бројки веднаш предизвикаа бројни коментари на социјалните мрежи, каде дел од навивачите тврдат дека одредени репрезентации имале судиска наклонетост. Сепак, аналитичарите предупредуваат дека ваквата статистика сама по себе не е доказ за фаворизирање.

– Овие податоци само покажуваат колку често ВАР ги коригирал или потврдил судиските одлуки поврзани со прекршоците. Тие не докажуваат дека судиите систематски фаворизирале или оштетувале одредени репрезентации. Големиот број интервенции против Хрватска може едноставно да значи дека судиите на теренот почесто носеле погрешни проценки кои подоцна биле исправени од ВАР-собата – објаснуваат аналитичарите од истражувачката група.

Без разлика на ваквите објаснувања, статистиката сигурно ќе биде дополнителен аргумент за хрватските навивачи, кои уште долго ќе сметаат дека нивната репрезентација била една од најоштетените на Светското првенство.