ХРВАТ ЈА УБИЛ СОПРУГАТА СО МАЧЕТА НА УЛИЦА ВО ГЕРМАНИЈА Жртвата се обидела да избега, но се срушила, граѓани го совладале напаѓачот

60-годишен хрватски државјанин е осомничен дека ја убил својата 58-годишна сопруга среде улица во германскиот град Келкхајм, во покраината Хесен. Според германските медиуми, мажот бил приведен веднаш по нападот, откако неколку граѓани успеале да го совладаат и да го задржат до доаѓањето на полицијата.

Осомничениот, кој денеска треба да биде изведен пред судија, ќе се соочи со одлука дали ќе му биде одреден истражен притвор.

Според сведоци на трагичниот настан, мажот ја нападнал сопругата со остар предмет, а некои од нив тврдат дека користел мачета. Еден од очевидците раскажал дека напаѓачот најверојатно бил под дејство на алкохол и дека ѝ нанел смртоносна повреда во пределот на вратот.

– Сè беше прекриено со крв – раскажал сведокот, кој рекол дека бил во близина на местото на нападот и дека во страв за својот живот избегал.

Според наводите на очевидци, жената се обидела да побегне по нападот, но набрзо се срушила. Други сведоци изјавиле дека нападот траел многу кратко и дека успеале да видат само еден удар пред сè да заврши.

Државното обвинителство во Франкфурт потврди дека двајцата сопружници биле хрватски државјани и дека биле во брак од 1991 година. Бидејќи истрагата е во рана фаза, обвинителството засега не открива детали за можниот мотив ниту за околностите што довеле до трагедијата.

Нападот се случил во вторникот вечерта во фреквентен дел од градот, каде што има повеќе угостителски објекти и во тој момент имало голем број луѓе.

Полицијата официјално соопшти дека станува збор за напад со ладно оружје, додека дел од сведоците тврдат дека напаѓачот користел мачета. Жената починала на местото на нападот од здобиените повреди.

Поради големиот број луѓе кои присуствувале на трагедијата, на местото биле испратени и стручни лица за психолошка помош за сведоците кои биле вознемирени од случувањето.

По нападот, неколку граѓани успеале да го совладаат осомничениот во близина на градскиот плоштад. При приведувањето тој се здобил со полесни повреди.

Во текот на ноќта полицијата извршила детален увид, собирала траги од местото на злосторството и разговарала со повеќе сведоци за да ги утврди сите околности.

Истражен судија од Општинскиот суд во Франкфурт треба да одлучи дали осомничениот ќе остане во притвор.

Мотивот за нападот засега не е официјално познат. Полицијата и обвинителството продолжуваат со истрагата.

Во меѓувреме, жители на Келкхајм на местото на трагедијата оставаат цвеќе и палат свеќи во знак на сеќавање на починатата жена.