ФРАНЦИЈА ГО НАМАЛИ ПРОИЗВОДСТВОТО НА НУКЛЕАРКАТА НА РЕКАТА ГАРОНА Еден блок е привремено исклучен поради опасност од прегревање на реката

Франција поради топлотниот бран привремено го намали производството на струја од нуклеарките за околу 4,1 гигавати, или 7% од вкупната побарувачка.

Блокот Голфеш 2 на реката Гарона беше привремено исклучен од мрежата поради високите температури и опасноста од прегревање на водата во реката, според податоците од операторот на мрежата RTE и француската компанија за електрична енергија (EDF).

Како што е наведено во соопштението, француските еколошки прописи строго ја ограничуваат максималната дозволена температура на речната вода низводно од електраната, која за Гарона е околу 28 степени Целзиусови, со цел да се заштити дивиот свет, првенствено рибите и речната флора.

Кога самата река ќе ја достигне таа критична точка, EDF е законски обврзан да ја намали моќноста на реакторот или целосно да го запре, така што вратената вода нема дополнително да ја покачи температурата на реката и да ја загрози биосферата.

Реакторите не се исклучуваат затоа што „не можат да работат“, туку за да се спречи прегревање на реките.

Ова сезонско ограничување не е универзална маана на нуклеарната технологија, туку специфичност на локацијата и избраниот систем за ладење.

Нуклеарните електрани се дизајнирани да работат на екстремно високи надворешни температури, а топлината не влијае на нивната функционална безбедност, а проблемот што се јавува во текот на летото е исклучиво прашање на термичкото оптоварување на реките, објавува порталот Nuclear Perspective.

Нуклеарните електрани што користат таканаречен отворен систем за ладење земаат вода од реката, ја користат за ладење на кондензаторите, а потоа ја враќаат во речниот тек, малку загреана, обично за неколку степени.

Кога надворешните температури се екстремни, како што беше забележано деновиве кога температурите во Франција надминаа 44 степени Целзиусови, самите реки природно се загреваат.