ЕУ ПОДГОТВУВА ГОЛЕМА РЕФОРМА ВО БАНКАРСКАТА РЕГУЛАТИВА Ќе можат ли европските да им конкурираат на банките во САД?

Европската Унија подготвува една од најголемите реформи на банкарската регулатива во последните неколку години. Целта е да се намали регулаторното оптоварување, да се ослободи капитал за инвестиции и да се поттикне создавање посилни пан-европски банки кои би можеле да се натпреваруваат со американските финансиски гиганти.

Брисел размислува да укине дел од правилата познати како „Столб 2“, кои им дозволуваат на националните регулатори да бараат од банките да чуваат дополнителни капитални резерви над основниот коефициент на левериџ (користење на позајмени пари за инвестирање или тргување) од 3%. Покрај тоа, нацрт-реформата предвидува намалување на дополнителните слоеви за заштита на капиталот, поедноставување на регулаторното известување и понатамошен развој на заеднички европски систем за осигурување на депозити.

Една од главните цели на реформата е да се поттикнат прекуграничните спојувања на банките, што би ѝ дало на Европа доволно големи институции за да се натпреваруваат рамноправно со американските финансиски гиганти.

Најавените реформи доаѓаат во време кога и Соединетите Американски Држави и Обединетото Кралство размислуваат за олабавување на одредени банкарски регулативи. На пример, во САД се предлага намалување на капиталните барања за најголемите банки за речиси 5%.

Пониските капитални барања, според експертите , би им овозможиле на банките да постигнат повисок поврат на капиталот, што би ги направило нивните акции попривлечни за инвеститорите. Сепак, тие предупредуваат дека самото намалување на регулаторните барања нема автоматски да ја зголеми ефикасноста на секторот, но може да им помогне на европските банки полесно да се натпреваруваат со најголемите финансиски институции во светот.

Разликата во резултатите е веќе видлива. Американските банки како што се „Џеј Пи Морган Чејс“, „Бенк оф Америка“, „Ситигруп“, „Велс Фарго“ и „Голдман Сакс“ објавија силни деловни резултати за вториот квартал, благодарение на растот на приходите од тргување и закрепнувањето на пазарот на преземања и спојувања.

Од друга страна, европските банки, вклучувајќи ги Сантандер, УниКредит, УБС и Дојче Банк, ќе ги објават своите резултати во текот на втората половина од месецот.

Ендру Стимсон, раководител на истражувањето на европските банки во KBW, верува дека Брисел конечно сфатил дека самото административно поедноставување нема да биде доволно за зајакнување на конкурентноста на европскиот финансиски сектор.

Тој истакнува дека Европа појасно ги препознава сопствените стратешки слабости, особено во областите на одбраната, вештачката интелигенција и енергетската инфраструктура. Ова се проекти што бараат огромни инвестиции, а банките треба да играат клучна улога во нивното финансирање.

Како што предупредува, самото намалување на бирократијата нема да овозможи изградба на нови фабрики, електрани или центри за податоци. Ова бара финансиски сектор што има повеќе капитал и поголем капацитет за кредитирање.

Европскиот банкарски сектор со години се смета за премногу фрагментиран. Бројни национални банки работат на сопствените пазари, додека американските конкуренти постигнуваат поголема ефикасност благодарение на својата големина и доминираат во инвестициското банкарство, пазарите на капитал и тргувањето со хартии од вредност.

Европската централна банка долго време се залага за создавање единствен банкарски пазар каде што капиталот и ликвидноста би можеле слободно да циркулираат меѓу членовите, со еднаква заштита за депонентите.  Но, во практика тоа тешко се остварува.