ЕУ ПАТОТ ПОВТОРНО ПОД ЗНАК ПРАШАЛНИК Историските спорови остануваат најсилната алатка за притисок врз Македонија

И покрај бројните политички иницијативи и дипломатски обиди за приближување на позициите, прашањата поврзани со историјата и идентитетот продолжуваат да бидат едно од главните жаришта во односите меѓу Скопје и Софија. Според оценките на политиколозите, токму овие теми остануваат во центарот на бугарските медиумски и политички дебати кога станува збор за европската перспектива на Македонија.

Во бугарскиот јавен простор сè почесто се пласира тезата дека Заедничката историска комисија се наоѓа во сериозен застој и дека во актуелните политички околности тешко може да се очекуваат позначајни резултати од нејзината работа. Ваквите оценки се поврзуваат со разликите во пристапот на двете држави кон улогата на историските прашања во процесот на европска интеграција.

Во бројни анализи и коментари во Бугарија се нагласува потребата од целосно спроведување на обврските преземени со протоколите од 2022 година, особено во делот што се однесува на работата на историската комисија, отворањето на архивите и спречувањето на говорот на омраза. Политиколозите оценуваат дека преку ваквите пораки се испраќа јасен сигнал дека без напредок во овие области не може да се очекува ниту напредок во евроинтегративниот процес.

Од друга страна, ставот на македонското раководство дека историјата не треба да биде услов за членство во Европската Унија директно се судира со бугарската позиција историските теми да останат составен дел од преговарачката рамка. Токму поради тоа, дел од бугарските коментатори предвидуваат дека работата на комисијата и во иднина ќе биде проследена со блокади, несогласувања и ограничени резултати.

Сите овие пораки упатуваат на заклучокот дека Софија не очекува брзо затворање на историските спорови и дека прашањата поврзани со минатото ќе продолжат да играат значајна улога во политичките односи меѓу двете земји, но и во процесот на европска интеграција на Македонија.