🎥 ЕМА ХЕМИНГ ЈА РАЗЈАСНИ СОСТОЈБАТА НА БРУС ВИЛИС Фронтотемпоралната деменција не влијае на меморијата, туку на говорот

Појавувајќи се во подкастот „The Bossticks“, сопругата на холивудскиот актер Брус Вилис, Ема Хеминг Вилис разјасни една од најчестите заблуди за борбата на нејзиниот сопруг со деменцијата.

Поранешната манекенка објасни дека фронтотемпоралната деменција не е иста како Алцхајмеровата болест и дека постојат три различни форми на болеста.

– Формата што ја има Брус влијае на говорот, но постои и варијанта што влијае на однесувањето, како и една што влијае на движењето – рече таа.

Кога ја прашаа дали болеста влијае на неговата меморија, Ема одговори негативно.

– Не, не влијае. Тоа е друг дел од мозокот. Кога луѓето прашуваат: „Дали се сеќава кој сте?“, одговорот е да, бидејќи тој нема Алцхајмерова болест, тој има фронтотемпорална деменција – објасни таа и додаде дека многу луѓе автоматски ја поврзуваат деменцијата со губење на меморијата.

– Тоа е многу честа заблуда. Кога помислуваме на деменција, веднаш помислуваме на губење на меморијата – рече Ема.

Таа нагласи дека нејзиниот 71-годишен сопруг ги препознава членовите на семејството, вклучувајќи ги и сите негови пет ќерки.

– Различна е од Алцхајмеровата болест. Алцхајмеровата болест е најчестата форма на деменција, додека фронтотемпоралната деменција е најчестата форма на деменција кај луѓе под 60 години – истакна таа.

Семејството на Брус Вилис објави во март 2022 година дека актерот се повлекува од глумата откако му беше дијагностицирана афазија. Во февруари следната година беше потврдено дека страда од фронтотемпорална деменција.

Американските медиуми, исто така, објавија дека Ема Хеминг и Брус Вилис сега живеат во одделни домови како што напредува болеста.

Двојката има две ќерки, Мејбл (14) и Евелин (12), додека Брус има уште три ќерки од бракот со Деми Мур – Румер (37), Скаут (34) и Талула (32).