ЕДЕН МЕЧ ДО ПЕХАРОТ И 500.000 ДЕНАРИ Мега Лифтови и Руди Компани вечерва за титулата на „Сокол“

По речиси еден месец исполнет со возбудливи натпревари, пресврти и неизвесни завршници, XXII Меморијален турнир во мал фудбал „Оливер Соколов – Сокол“ вечерва ќе го добие својот победник.

На игралиштето „Сокол“ во Карпош 1, со почеток во 20:30 часот, за шампионскиот трофеј ќе се борат Мега Лифтови и Руди Компани. Финалистите до големата завршница стигнаа по две различни, но подеднакво возбудливи полуфинални пресметки.

Руди Компани во полуфиналето славеше со 3:1 против Кеги Моби СК 77777, додека Мега Лифтови и Јувентус БС Скеле одиграа 1:1 во регуларниот дел, по што Мега Лифтови обезбеди пласман во финалето со победа од 4:3 на пенали.

Така, вечерва следува директна пресметка за пехарот меѓу две екипи кои стигнаа до самиот крај на турнирот.

Покрај престижниот трофеј, финалето носи и значајна парична награда. Победникот ќе добие 500.000 денари, додека второпласираниот ќе биде награден со 250.000 денари. Награди се предвидени и за третото и четвртото место, во износ од 120.000, односно 60.000 денари.

Организаторите за годинашното издание најавија вкупен награден фонд од над 1,3 милиони денари.

Финалето ќе се игра на добро познатото игралиште „Сокол“ во Карпош 1, каде традиционално се собираат голем број љубители на мал фудбал.

Мега Лифтови или Руди Компани – вечерва ќе биде познат новиот победник на XXII Меморијален турнир „Оливер Соколов – Сокол“.