📽️ ДВОЕН ВРТЛОГ ОД МОРЕТО БЕСНЕЕ НА СИЦИЛИЈА Торнадото фрли автомобил од патот, уништи куќа, оштети училиште

Разорно торнадо ја погоди западна Сицилија, повредувајќи тешко две лица и предизвикувајќи голема материјална штета во неколку италијански градови. Невремето започнало како двоен вртлог над морето, во близина на пристаништето во Марсала, а потоа со огромна сила навлегло на копното, превртувајќи возила, оштетувајќи куќи и уривајќи далноводи.

Најтешките последици се забележани во Петрозино и Марсала, додека штети се пријавени и во Мазара дел Вало.

Две лица се сериозно повредени во близина на Петрозино, откако торнадото го зафатило автомобилот во кој се наоѓале и го исфрлило од патот.

Во Марсала, пак, силниот ветер превртувал автомобили и камиони, оштетувал станбени објекти и корнел далноводи. Според локалните медиуми, една куќа е целосно уништена.

Особено голема штета претрпело училиштето „Алчиде де Гаспери“, во населбата Теренове во Марсала.

На снимките објавени од италијанските медиуми се гледаат искршени прозорци и делумно урнат таван на училиштето.

Спасувачките екипи и службите за итни интервенции се на терен и работат на расчистување на урнатините и санирање на штетите.

Салваторе Кочина, шеф на Агенцијата за цивилна заштита на Сицилија, го опиша невремето како исклучително жестоко.

– Беше речиси како американско торнадо; никој не памети нешто со таков интензитет – изјави Кочина за Ројтерс.

 

❗️Danni diffusi a sud di Marsala (TP) a seguito del passaggio di un tornado questa mattina.

Danni diffusi e diversi feriti. Video di Panificio Maltese e Sebastiano Grasso. https://t.co/1bPedr2Jg3

— Italia 24H Live 🔴 – Notizie dall’Italia (@Italia24HLive) October 9, 2026

Тој потсети дека Цивилната заштита уште во септември предупредила на можноста од екстремни временски појави во текот на есента.

Според него, еден од факторите за ваквите невремиња е големото количество топлина што се акумулирало во морето по исклучително жешкото лето.

– Ова уште еднаш го истакнува проблемот со екстремните временски настани, кои станаа карактеристика на последните години поради климатската криза – додаде Кочина.

Претседателот на регионот Сицилија, Ренато Шифани, најави издвојување посебни средства за итни интервенции и помош во погодените подрачја.

Опасноста, меѓутоа, сè уште не е помината. Метеоролошкото предупредување останува на сила и за утре, бидејќи на Сицилија се очекуваат нови дождови и невреме.

Додека Сицилија се справува со последиците од торнадото, италијанското копно е погодено од друг екстремен бран кој предизвика апокалиптични поплави во Неапол и регионот Кампанија.

Поројните дождови ги претворија улиците во реки и ги принудија властите итно да ги затворат училиштата во 46 општини, додека пожарникарите спасуваат заглавени возачи од надојдените води.