ДОСЕГА 314 МРТВИ ВО ЗЕМЈОТРЕСОТ ВО КОЛУМБИЈА Повредени се 4.437 луѓе, се трага по 262

Бројот на загинати во катастрофалниот земјотрес со магнитуда од 7,4 степени што ја погоди западна Колумбија се зголеми на 314 лица – покажува најновиот извештај што го објави Националната единица за управување со ризици од катастрофи (УНГРД).

Во извештајот се посочува дека спасувачките екипи сè уште трагаат по 262 исчезнати лица. Бројот на повредени се издигна на 4.437, додека 364 лица се живи извлечени од урнатините. Вкупно 262.154 жители официјално се регистрирани како погодени од непогодата во 471 општина, распоредени во 15 од вкупно 32 департмани во Колумбија.

Земјотресот, кој се случи на 10 август во 7:34 часот по локално време (12:34 часот по Гринич), е најсилниот сеизмички удар што ја погодил Колумбија во овој век. Епицентарот се наоѓал во близина на Сан Хозе дел Палмар во пацифичкиот департман Чоко, на длабочина од околу 110 километри. И покрај големата длабочина, разурнувањата брзо се прошириле низ западниот „Кафеен појас“ на земјата и низ големите урбани центри.

Физичките оштетувања на инфраструктурата сериозно ги нарушија регионалните здравствени и транспортни мрежи. Според податоците на УНГРД, најмалку 30.664 куќи се целосно уништени, 136.946 претрпеле сериозни структурални оштетувања, а 302 објекта се целосно урнати, главно во градовите Кали и Переира.

Структурни оштетувања се регистрирани и на 3.470 училишта, 4.971 центар во заедницата и 352 здравствени установи, од кои неколку биле принудени евакуираат пациенти. Оштетени се и 449 патишта, 58 мостови за возила, 13 пешачки мостови, 105 општински водоводни системи и пет регионални аеродроми.

Во Кали и Переира, тимовите за процена со црвена боја означуваат стотици небезбедни објекти со натпис „No Habitar“ („Не е за живеење“), со што се предупредува на непосредна опасност од нивно уривање. Поради тоа, илјадници раселени жители ноќите ги поминуваат во привремени засолништа или во импровизирани кампови на отворено.

Надвор од градовите, оддалечените рурални општини во департманите Чоко, Калдас и Киндио и натаму се отсечени поради свлечишта што ги блокираат главните патишта. Хуманитарните организации предупредуваат дека обилните сезонски врнежи, загадената вода за пиење и ризикот од нови свлечишта дополнително ги зголемуваат здравствените ризици за населението.

Според економистите и аналитичарите, првичните материјални штети и нарушувањата во транспортот ќе достигнат милијарди долари, што го прави овој земјотрес една од најскапите операции за обновување во поновата историја на Колумбија.