ЧЕТВОРИЦА ВРАБОТЕНИ ВО СКОПСКАТА ЗООЛОШКА ЌЕ БИДАТ ПОД ЗДРАВСТВЕН НАДЗОР Еден од нив ќе биде тестиран за птичји грип
Здравствен надзор согласно протоколите не подразбира карантин и изолација, туку медицинско следење, во текот на следните две недели, за тоа дали ќе пројават каков било симптом поради кој понатаму би требало да се испитува дали станува збор за птичји грип. Тие секојдневно ќе бидат контактирани од епидемиолози од Институтот за јавно здравје и ќе се следи нивната здравствена состојба, изјави денеска директорката на Институтот за јавно здравје, Марија Андоновска.
Од 15-те вработени во скопската Зоолошка градина, за кои веќе е завршена епидемиолошката анкета од страна на епидемиолози од Центарот за јавно здравје (ЦЈЗ) и од Институтот за јавно здравје (ИЈЗ), за четворица во текот на утрешниот ден ќе бидат издадени решенија за здравствен надзор, а кај еден од нив, кој во петокот пројавил симптоми на покачена температура и дијареја, ќе биде извршено тестирање за присуство на птичји грип. За 16-тиот од листата, кој сѐ уште не е исконтактиран, ќе се направат напори да биде исконтактиран во текот на денешниов ден, информира директорката на Институтот за јавно здравје (ИЈЗ), Марија Андоновска.
– Здравствен надзор согласно протоколите не подразбира карантин и изолација, туку медицинско следење, во текот на следните две недели, за тоа дали ќе пројават каков било симптом поради кој понатаму би требало да се испитува дали станува збор за птичји грип. Тие секојдневно ќе бидат контактирани од епидемиолози од ИЈЗ и ќе се следи нивната здравствена состојба – изјави денеска Андоновска пред Институтот за јавно здравје.
Епидемиозлозите, како што рече, ја информирале дека еден од четирите лица за кои е завршена епидемиолошката анкета, на 18 октомври имал симтоми со температура и дијареја кои траеле еден ден што, според нејзиното тврдење, не значи дека укажува дека тоа лице има птичји грип.
– Тоа лице ќе биде тестирано во текот на утрешниот ден бидејќи препораките од страна на епидемиолозите и микробиолозите се дека по појавата на првите симптоми во рок од 5 дена треба да има тестирање, појасни Андоновска.
Нагласи дека нема опасност за посетителите, кои биле во Зоолошката градина, доколку немале директен контакт со заболените птици од птичји грип.
– За да се пренесе птичји грип треба да има близок контакт со заболено или со мртво животно или да има близок контакт со некој од секретите, измет или слично од овие заболени или мртви животни. Тоа значи дека ризикот е мал доколку посетителите немале близок контакт – потенцира Андоновска.
Таа смета дека надлежните институции во текот на вчерашниот ден имале брза и навремена реакција согласно законските прописи и протоколи. Андоновска вели дека Лабораторијата на ИЈЗ е референтна и меѓународно акредитирана лабораторија за дијагностика на инфлуенца или грип од хумано и од анимално потекло и дека во моментов има тестови за птичји грип, но додава дека не знае колкава ќе биде потребата и дали ќе треба да се набавуваат нови.