AВСТРАЛИЈКА ЈА ОТРУЛА ФАМИЛИЈАТА СО ПЕЧУРКИ Обвинителите бараат Ерин Патерсон никогаш да не излезе од затвор

Австралиските обвинители бараат Ерин Патерсон никогаш да не излезе од затвор. Таа е осудена доживотно за убиство на тројца роднини со отровни печурки.

Обвинителството ја обжали пресудата бидејќи Патерсон може да побара условно ослободување по 33 години. Според обвинителите, таквата можност е несоодветна на тежината на злосторствата.

Патерсон во 2023 година ги поканила роднините на ручек во својот дом во Викторија. Им послужила говедско „Велингтон“ со смртоносни зелени пупавки.

Загинале родителите на нејзиниот поранешен сопруг, Дон и Гејл Патерсон, и Хедер Вилкинсон, сестрата на Гејл. Четвртиот гостин, Иан Вилкинсон, преживеал, но претрпел тешки последици.

Им рекла дека има рак, ги отрула на молитва 

Обвинителите пред судот посочиле особено морничав детал од последниот заеднички ручек. Патерсон ги излажала гостите дека има рак. Откако го изеле отруениот оброк, тие заедно се молеле за нејзиното здравје.

– Таа седела и ги гледала своите жртви како го јадат смртоносниот оброк, додека разговарале и се шегувале – навело обвинителството.

Според обвинителите, Патерсон со месеци го подготвувала злосторството. Набавила доволно отровни печурки и измислила приказна за да ги собере роднините на масата.

Знаела дека се борат за живот, продолжила да лаже

Патерсон не признала дека употребила собрани отровни печурки ниту кога гостите завршиле во болница.

– Дури и кога знаела дека некои од жртвите се на апарати за одржување во живот, продолжила да лаже – рекле обвинителите.

Апелациониот суд во Мелбурн истовремено разгледува и жалба од нејзината одбрана. Адвокатите бараат пресудата целосно да биде поништена поради наводни сериозни пропусти во судењето.

Судот дополнително ќе одлучи за двете жалби.