АРИЈАНА ГРАНДЕ СЕ СМИРИ СО БИВШИОТ Пејачката објави фотографии со кои потврди дека е повторно заедно со Рики Алварез
Аријана Гранде ги заинтригира обожавателите објавувајќи фотографии со своето поранешно момче, со кое раскина во 2016 година.
Аријана Гранде и нејзиниот поранешен партнер Рики Алварез повторно се заедно, а овојпат повеќе не се обидуваат да ја скријат својата романса. Пејачката објави серија фотографии на Инстаграм меѓу кои и две на кои се гледа со Алварез, кого го означи во објавата.
Со тоа, по неколку недели шпекулации, нивната обновена врска практично стана официјална на социјалните мрежи.
View this post on Instagram
Гранде и Алварез првпат се забавуваа во периодот од 2015 до 2016 година, откако се запознаа додека тој беше еден од нејзините танчери. По раскинувањето останаа во добри односи и со текот на годините продолжија да бидат блиски. Токму нивното долгогодишно пријателство сега се претвори во нова романтична приказна.
Гласините дека повторно се зближиле започнаа во јуни, кога двајцата беа забележани заедно во Остин, Тексас. Алварез потоа се појави и на неколку настапи на „Eternal Sunshine Tour“ на Гранде, што дополнително ги поттикна шпекулациите. Во јули, пак, Аријана го означи Рики на фотографија објавена на Инстаграм, што беше еден од првите суптилни знаци дека меѓу нив повторно се случува нешто.
Особено внимание привлече и нејзиниот настап во Њујорк, кога Гранде ги измени стиховите од песната „Thank U, Next“, во која го споменува Алварез како еден од своите поранешни партнери. Наместо првичниот текст, таа употреби поинакви стихови кои звучеа многу попозитивно кон него, што фановите веднаш го протолкуваа како знак дека повторно се заедно.
Според извори блиски до пејачката, Аријана и Рики не брзаат да ја дефинираат врската и сакаат работите да се одвиваат постепено. Наводно, токму фактот што долго време се познаваат и имаат изградено силно пријателство ѝ дава чувство на сигурност. Извор за PEOPLE наведува дека Гранде ја цени неговата позитивна енергија и смисла за хумор и дека покрај него се чувствува пријатно да биде своја.
Интересно е што обновувањето на романсата се случува во период кога Гранде најави дека по завршувањето на турнејата во септември планира да се повлече од јавноста и да поминува повеќе време подалеку од медиумското внимание. Таа неодамна донесе и одлука да се откаже од настапот во обновената продукција на „Sunday in the Park with George“. По бурниот период во приватниот и професионалниот живот, се чини дека пејачката сега сака да забави – а во таа нова фаза повторно има место за човекот со кого некогаш ја делеше љубовта.