АКО СЕ ДОКАЖЕ КАРТЕЛСКО ЗДРУЖУВАЊЕ ЌЕ ИМА И КАЗНИ Мицкоски за случајот – четири големи синџири маркети и ССК
Никому ништо не должиме. Должиме на народот кој ни ја дал довербата, 450.000 гласови пред една година и претседателката која освои 550 илјади. Повеќе од пола милион луѓе ни дале доверба, вели Мицкоски.
Со борбата против корупцијата не се занимаваме за да импровизираме. Ако се докаже картелското здружување, тогаш ќе има и казни, тврди премиерот Христијан Мицкоски во гостување во поткастот „Каде се парите?“, за случајот со четирите големи синџири маркети и ССК, за што Комисијата за заштита на конкуренцијата поведе прекршочна постапка бидејќи постапиле спротивно на законот со одлуката да не прифаќаат нови ценовници од добавувачите.
-Претпоставувам, мислите на нефер трговските практики и за картелското здружување. Би почекал тука со одлука, затоа што и самиот Закон е таков, вели потребен е период од девет месеци, а тој почна на први октомври минатата година, значи некаде до крајот на јуни, за да се направи некаква споредба во делот на нефер трговските практики. Од аспект на тоа дали Владата е во положба да ги брани овој тип на картелско здружување или големите маркети, доволно е да се вратиме неколку месеци наназад, кога ја почнавме онаа акција за замрзнување на профитната, дистрибутивната маржа, и ќе видите какви критики имаше од страна на дел од овие синџири. А, нашите информации, непотврдени мора да кажам, велат дека тие инструирале и политичка партија од опозицијата да прави пресови напаѓајќи ја Владата… Тогаш, ќе го добиете одговорот дека не само што не го поддржуваме тоа, туку напротив, се бориме жестоко, и за тоа имаме политички одреден конфликт. Бидејќи на нивните прес-конференции нема економско обраќање и економски позиции, има политички – вели Мицкоски.
Тој е дециден дека нема да има импровизации во борбата со корупцијата.
-Апсолутно, ако се утврди, ако има докази, се разбира. Јас повторно ќе кажам, ние со оваа работа немаме намера да се занимаваме за да импровизираме. Никому ништо не должиме. Должиме на народот кој ни ја дал довербата, 450.000 гласови пред една година и претседателката која освои 550 илјади. Повеќе од пола милион луѓе ни дале доверба – рече Мицкоски.
За целосно спроведување на одредбите од Законот за нефер трговски практики, се засилуваат капацитетите на КЗК.
-Од информациите со кои располагам, тие упатија барање до Министерството за финансии за вработување на неколкумина, со кои кадровски би се засилиле и добија позитивен одговор. Мислам дека процесот на селекција веќе тече и многу скоро ќе има и кадровско освежување на таа Комисија -рече Мицкоски.