„АКО ПАДНЕМЕ, 20 МИЛИОНИ УКРАИНЦИ ЌЕ ДОЈДАТ ВО ЕВРОПА“ Зеленски бара пари, ракети и алтернатива за „Старлинк“

Украина ја има поддршката од сите европски лидери, изјави денеска украинскиот претседател Володимир Зеленски, негирајќи ги извештаите дека европската страна го замолила да го ублажи тонот во разговорите со американскиот претседател Доналд Трамп.

– Немаше никакви забелешки за време на денешните состаноци. Слушнав само поддршка од моите европски колеги, за што сум благодарен – рече Зеленски на прес-конференција во Брисел по учеството во делот од Самитот на ЕУ посветен на Украина и по неколку билатерални разговори со лидерите на европските земји.

Прашан за неговите односи со Трамп и коментарите на американскиот претседател дека е потешко да се преговара со него отколку со рускиот лидер Владимир Путин, Зеленски рече дека мора да го брани опстанокот на својата земја.

Тој истакна дека договорот на Трамп со Русија за увоз на дизел е погрешен и дека по тоа „влегуваме во лизгава патека“, што потоа би можело да доведе до договор за рускиот гас, потоа укинување на санкциите врз банкарскиот систем, врз одредени поединци, хемиската индустрија и конечно, врз замрзнатите руски средства.

– Најважно е Русија да нема можност подоцна да го поврати имотот, бидејќи е познато дека Москва сака да ги добие овие средства. Тоа е една од целите на Русија и затоа Украина би сакала да добие одредени средства во одреден формат, пред Русија да успее да го стори тоа – рече Зеленски.

На прашањето дали Украина ќе продолжи да ги напаѓа руските рафинерии, додека Трамп бара нападите да престанат, Зеленски рече дека обично не зборува за деталите за операциите.

– Ќе видите – рече тој.

Зеленски рече дека Путин не сака мир и дека сака да ја уништи Украина.

– Тој не го почитува нашиот суверенитет и територијален интегритет, Донбас не му е доволен. Ако паднеме, 20 милиони Украинци ќе дојдат во Европа, затоа бараме да останеме силни и да ја браниме нашата земја – рече украинскиот претседател.

Зеленски рече дека американскиот сателитски систем Старлинк, кој Украина го користи за соборување руски ракети, не бил исклучен, но дека неговата брзина била значително намалена.

Тој додаде дека се работи на алтернативата на „Старлинк“, но не и на целосна замена, и дека Украина соработува со Франција за да обезбеди дополнителен капацитет.

– Зборувајќи за споделување разузнавачки информации, многу земји ги споделуваат своите разузнавачки информации со нас. Зборуваме за десетици земји. Ја воспоставивме оваа линија и тоа е прилично солидна помош. Благодарни сме на сите. Зборувајќи за лансирање балистички ракети, тоа се информациите што ги добиваме од САД, а тука гледате многу предизвици поврзани со балистичките ракети на прво место. Би сакал да нагласам дека работиме на сите можности за да ја направиме Украина што е можно понезависна – рече тој.

На инсистирање на новинарите да ја објаснат моменталната ситуација со „Старлинк“, Зеленски рече дека на Украина ѝ се потребни одредени нивоа на брзина на интернет за „Старлинк“ и дека Украина може да го користи тој систем за длабински напади против Русија, но дека тоа не е случај.

– Не го користиме „Старлинк“ за напад или одговор на руски цели на руска територија, поради што се обраќаме до „СпејсИкс“ и Белата куќа да ни ја отворат оваа можност, бидејќи ја немавме таму каде што ја користевме, и затоа беше многу непријатно изненадување. Го користевме „Старлинк“ за пресретнување авиони што ја напаѓаат нашата цивилна инфраструктура и ги убиваат нашите семејства. Користевме специјални пресретнувачи со голема брзина, пресретнувачи на дронови што се движат благодарение на „Старлинк“. Значи, „Старлинк“ не е надвор, но нивните ограничувања на брзината беа намалени, а кога ограничувањата на брзината беа намалени, станавме неспособни да соборуваме одредени дронови – објасни Зеленски.

Тој додаде дека украинското Министерство за одбрана е во контакт со САД и дека има сигнали од Белата куќа дека ќе ги вратат тие можности.

Рече дека им се потребни ракети.

– Добиваме ракети ПАЦ-2 и ПАЦ-3 од САД преку програмата Пеарл, а сето тоа е финансирано од Европа, па затоа не е подарок, не е бесплатно. Повеќето од ракетите сега се испраќаат на Блискиот Исток, па затоа е јавна тајна дека во моментов не сме приоритетна дестинација за овие ракети, но сепак сме многу благодарни за сите ракети што можеме да ги добиеме преку оваа програма. Затоа сме благодарни на НАТО, на Европејците кои го финансираат сето ова, и сме благодарни на администрацијата на Белата куќа. Благодарни сме на САД – рече Зеленски.

Според него, ракетите се купуваат не само од САД, туку и од ЕУ и други земји во светот.

Кога еден новинар го праша дали мисли дека служи како жртвено јагне за домашните политички проблеми на Трамп, со оглед на тоа што републиканците се соочуваат со губење на контролата и врз Претставничкиот дом и врз Сенатот на среднорочните избори за неколку недели, Зеленски направи долга пауза, се насмеа и рече: „Тоа е мојот одговор“.

На Самитот тој од лидерите на Европската Унија побара дополнителна поддршка.

– Војната ќе чини 155 милијарди евра следната година и ни требаат уште најмалку 70 милијарди евра од вас за одбрана, за оружје. Ова е реална сума. Ве молам да најдете начин да ја обезбедите таа поддршка – рече Зеленски на самитот на ЕУ во Брисел.