ЈА ЧЕКАЛ ПРЕД ЗГРАДАТА, ЈА УБИЛ И СЕ ЗАСТРЕЛАЛ Љубомора и тајна врска зад фемицидот во Атина

Нови детали излегуваат на виделина за убиството на 45-годишната Лулјета Обзова во атинската населба Неа Смирни. Жената била застрелана од 48-годишниот Алтин Алмуча, кој веднаш потоа се самоубил. И двајцата биле со албанско потекло, а грчката полиција преку снимки од безбедносните камери, сведочења на нивните семејства и анализа на мобилните телефони се обидува да ја реконструира нивната врска и настаните што му претходеле на злосторството.

Снимките од камерите покажуваат дека Алмуча ја чекал жената пред нејзиниот дом. Кога таа излегла од зградата, тој ѝ пришол и ја застрелал, а потоа го свртел оружјето кон себе. Грчки News247 објавува дека нападот бил особено суров и дека 48-годишникот ја принудил жената да клекне пред да пука во неа.

Начинот на кој ја чекал пред домот е еден од елементите поради кои полицијата проверува дали убиството било однапред подготвено.

Лулјета Обзова била подолго време разделена од поранешниот сопруг. Нејзината мајка изјавила дека ќерка ѝ никогаш не ѝ кажала дека има нова љубовна врска или дека има проблеми со некого. Меѓутоа, Лулјета ѝ се доверила на својата сестра дека се гледа со маж и дека решила да ја прекине врската поради неговата љубомора. Според информациите што ги пренесуваат медиумите, мажот продолжил да инсистира на врската, а таа се плашела од него. Ноќта кога била убиена, 45-годишната жена била сама дома. Нејзината ќерка не била во Атина, туку заминала во Агринио со својот вујко.

Грчките медиуми претходно објавија дека Алмуча извесен период доаѓал во домот на жртвата, што е уште една околност што ја проверуваат истражителите за да утврдат колку долго траела нивната врска и што се случувало непосредно пред раскинувањето. Алмуча, пак, бил оженет и имал дете.

Неговата сопруга на полицијата ѝ кажала дека не знаела за неговата врска со Лулјета, но дека во последните околу 18 месеци забележувала голема промена во неговото однесување. Тој често отсуствувал од дома, а понекогаш не се враќал да преспие. Непосредно пред злосторството ѝ оставил на сопругата 1.000 евра и ѝ рекол да ги чува, детал што истражителите го разгледуваат при реконструкцијата на неговите последни часови.

Истрагата открива дека Алмуча и претходно имал проблеми поради однесување кон жена. Според информации од Албанија што ги пренесуваат грчките медиуми, тој бил уапсен во Тирана во 2016 година поради вознемирување на поранешната сопруга.

Полицијата сега го испитува неговото минато, а во неговиот дом во атинската населба Таврос биле барани електронски уреди, документи и други предмети што би можеле да покажат дали и како го подготвувал злосторството. Клучни за конечната реконструкција треба да бидат мобилните телефони и електронските комуникации на двајцата. Истражителите ги проверуваат нивните пораки, контакти и последни разговори за да утврдат што точно се случувало меѓу нив и дали Лулјета се обидувала дефинитивно да ја прекине врската.

Сведочењата на нејзините блиски, заедно со снимките на кои е регистриран нападот, засега ја насочуваат истрагата кон љубомората и прекинувањето на врската како можен контекст на фемицидот, додека официјалниот мотив сè уште се утврдува.