📽️ МОТОРОТ ОТКАЖА, СТАРШИП СЕПАК ЈА ОБИКОЛИ ЗЕМЈАТА Спејс Икс во орбитата остави и 26 сателити

Откажа мотор, контролниот центар процени дека мисијата може да продолжи, а Старшип за првпат стигна во орбитата на Земјата. Четиринаесеттиот тест-лет на најголемата и најмоќна ракета на Спејс Икс така донесе пресвртница по серијата претходни суборбитални тестови.

Ракетата полета од базата „Старбејс“ во Тексас и достигна височина од околу 275 километри.

Критичниот момент дошол за време на искачувањето, кога откажал еден од моторите. Контролорите процениле дека Старшип може безбедно да продолжи, по што биле активирани погонските системи за одржување на планираната траекторија.

– Старшип е во орбитата – потврди инженерот Даниел Хјуит во преносот во живо.

 

After 15 years and $15 billion spent, Starship successfully deployed its 26 satellites into orbit. Congratulations to the SpaceX team and to Elon Musk, the leader! pic.twitter.com/276FjzTJxR

— Morning X(Janette) (@Amen28671) September 28, 2026

Од 6 круга до враќање предвреме

Првичниот план предвидувал Старшип шестпати да ја обиколи Земјата во текот на речиси 10 часа, а потоа да слета во Тихиот Океан западно од Чиле.

Но, нешто повеќе од еден час по полетувањето, Спејс Икс го промени планот. Наместо целата предвидена мисија, леталото било насочено кон Северниот Пацифик и се вратило приближно три часа по полетувањето.

Тоа не го спречило Старшип да изврши уште една важна задача. Во орбитата биле распоредени 26 сателити од новата генерација Старлинк.

Три од нив носеле камери со кои бил следен топлинскиот штит на Старшип. Снимките треба да им помогнат на инженерите при идните тестови.

 

Super Heavy has splashed down in the Gulf of America! pic.twitter.com/pEIjC2Aae1

— SpaceX (@SpaceX) September 28, 2026

Бустерот падна во морето, Старшип продолжи понатаму

Спејс Икс го тестира Старшип во целосен размер од 2023 година, но претходните летови биле суборбитални. Овојпат леталото морало да достигне брзина од околу 28.000 километри на час за да остане во орбитата.

Патот дотаму беше проследен со повеќе неуспеси. Еден претходен Старшип експлодирал кратко по полетувањето, друг се завртел надвор од контрола, а прототип експлодирал и при подготовките на лансирната рампа.

Спејс Икс овојпат не се обидел да го фати Суперхеви бустерот со механичките раце на лансирната кула. Бустерот се вратил кон Мексиканскиот Залив, додека Старшип ја продолжил мисијата во орбитата.

При враќањето, леталото со четири аеродинамични закрилки ги контролирало положбата и брзината. Пред допирот со водата се исправило и забавило, по што исчезнало во огнена топка.

Успешното достигнување на орбитата е важно и за идните планови на НАСА, која планира верзија на Старшип да се користи за транспорт на астронаути до површината на Месечината.