ГО БАРАЛЕ КАКО ИСЧЕЗНАТ, А ТОЈ СО ПАРИТЕ ОД ПЕНЗИОНЕРИТЕ СИ СЕ ЗАБАВУВАЛ ВО БАНКГОК? Поштар од Чапљина стана интернет атракција

Стипо Јукиќ од Вишиќи кај Чапљина, по кого беше распишана оперативна потрага поради сомнение дека извршил кривично дело затајување, е уапсен при враќањето во Босна и Херцеговина. Како што соопштија од Министерството за внатрешни работи на Херцеговско-неретванскиот кантон, Јукиќ бил уапсен на 16 септември околу 14:30 часот на Меѓународниот граничен премин Бијача.

Припадниците на Полициската управа Чапљина го презеле од Граничната полиција на БиХ и го сместиле во простории за задржување. За неговото апсење се известени Одделот за криминалистичка полиција и надлежниот обвинител, додека истражните дејствија продолжуваат.

Исчезнувањето на Јукиќ неговата мајка го пријавила на 7 септември, откако престал да ѝ се јавува. Полицијата за време на потрагата утврдила дека на 5 септември во вечерните часови тој се упатил кон Мостар.

Биле пронајдени неговото возило и мобилен телефон, а трагите воделе до еден мостарски хотел. Според неофицијални информации на порталот Hercegovina.info, од Мостар заминал за Сараево, од каде со авион преку Турција заминал за Бангкок.

МВР на ХНК дополнително потврди дека Јукиќ ја напуштил Босна и Херцеговина. Дека се наоѓа во Тајланд стана јасно откако на TikTok профилот „444dvanaest“ беше објавено видео на кое се гледа во друштво на девојка. На снимката изгледал добро расположен.

Случајот предизвика големо внимание во јавноста бидејќи Јукиќ работел како поштар, а во времето на неговото исчезнување на корисниците на подрачјето на Чапљина не им биле доставени меѓу 50 и 60 пензии кои претходно ги подигнал.

Против него на 10 септември беше поднесена пријава поради постоење основи на сомнение дека извршил кривично дело затајување од член 290 од Кривичниот закон на Федерацијата БиХ. Од тој момент полицијата повеќе не го бараше како исчезнато лице, туку како осомничен по кого е распишана оперативна потрага.

Хрватска пошта Мостар дополнително соопшти дека сите пензии на подрачјето на Чапљина во целост биле исплатени на 10 септември. Во ова претпријатие се покренати и интерни проверки во врска со целиот случај.

Интернет феномен

Приказната за поштарот од Чапљина во меѓувреме стана своевиден интернет феномен. На платформата 4fund беше покрената „хуманитарно-хумористична“ кампања со која беше планирано собирање на 15.000 евра за неговото враќање.

Меѓу наведените хумористични трошоци беа авионска карта на релација Бангкок – Сараево, крема за сончање и адвокат кој зборува тајландски и „нашки“. На Фејсбук беше формирана и страница под називот „Поддршка за Поштарот Стипо во Бангкок“.

Враќањето на Јукиќ сепак заврши со апсење на граничниот премин Бијача. Полицијата и Обвинителството сега треба да ги утврдат сите околности за неговото заминување од Босна и Херцеговина, како и тоа што се случило со парите што му биле доверени за исплата на пензиите.