🎥 ШТО ПРАВИ АЛЕН ИСЛАМОВИЌ КОГА НЕ ПЕЕ? „Ако јадете Нутела, можеби во неа се баш моите лешници“
Пејачот има околу 2.000 садници лешници на плантажа од 25.000 квадратни метри, а неговиот род го откупува Ferrero, компанијата позната по производите како Nutella и Ferrero Rocher.
Кога не е на сцена, Ален Исламовиќ има сосема поинаква работа – наместо микрофон, во рацете зема земјоделска алатка и се грижи за својата плантажа со лешници во близина на Бихаќ.
Поранешниот пејач на „Бијело дугме“ и „Дивље јагоде“ во земјоделството влегол пред повеќе години, а денес неговата плантажа е сериозен бизнис. Според неговата официјална страница, фармата „Исламовиќ“ е основана во 2016 година, а на површина од околу 25.000 квадратни метри биле засадени околу 2.000 садници лешник.
Исламовиќ во повеќе наврати раскажувал дека идејата се родила откако неговата сопруга наследила дел од земјиштето во Бихаќ, а тој купил друг дел. Анализата покажала дека песокливото земјиште во близина на реката Уна е погодно за одгледување лешници. Денес на плантажата има повеќе сорти, меѓу кои римски, истарски и англиски лешник.
– За лешниците не знаев речиси ништо, освен што како дете одев да ги берам – раскажал Исламовиќ, кој со текот на годините станал вистински познавач. Тој објаснил дека работата на плантажата трае од пролет до есен и опфаќа наводнување, прихрана, заштита од штетници и редовно одржување.
Особено е горд на квалитетот на својот производ. Уште во 2019 година раскажувал дека примероци од лешниците испратил на анализа во Швајцарија, каде што, според неговите зборови, биле изненадени од квалитетот.
– Како да сте земале лажичка Нутела – го опишал тогаш вкусот на својот лешник.
Интересот за неговиот производ стигнал и до големите производители на чоколада. Во 2019 година Исламовиќ зборувал дека за неговите лешници се интересираат преработувачи од Швајцарија и Австрија, како и италијанскиот гигант Ferrero Rocher. Во мај 2026 година Индекс објави дека неговиот род го откупува Ferrero, компанијата позната по производите како Nutella и Ferrero Rocher.
Според регионалните медиуми, приходот од плантажата може да достигне и околу 50.000 евра годишно, во зависност од приносот и временските услови.
Исламовиќ одамна најавува и сопствен бренд „Лешник од Уна“, а неговата идеја е плантажата да продолжи да се развива и да стане уште поголем земјоделски бизнис.