📽️ СЛОВЕНЕЦ ЌЕ ГО СУДИ ФИНАЛЕТО, СЕ РАСПЛАКА КОГА ДОЗНА ЗА ТОА Славко Винчиќ почнал како инженер, станал бестрашен судија
Славко Винчиќ важи за бескомпромисен арбитер кој не се плаши да покаже ни црвен картон кога натпреварот ќе излезе од контрола. Кариерата ја почнал како дополнителен судија во тимот на легендарниот Дамир Скомина, а денес зад себе има финале во Лигата на шампионите, финале во Лига Европа, Европски и Светски првенства.
Словенецот Славко Винчиќ се расплака кога слушна дека ФИФА му ја доверила најважната судиска задача во кариерата, финалето на Светското првенство меѓу Шпанија и Аргентина. Четириесетишестгодишниот арбитер зад себе веќе има финале во Лигата на шампионите и богата меѓународна кариера, но назначувањето за мундијалското финале очигледно силно го погодило.
Одлуката ја соопшти Пјерлуиџи Колина, легендарниот италијански судија кого многумина го сметаат за најпознат и најпочитуван арбитер во историјата на фудбалот.
Словенецот Винчиќ важи за „тврд орев“. На клупскиот Мундијал во 2025 покажа девет жолти и еден црвен картон на мечот Ривер Плата – Монтереј, што многумина го опишаа како доказ дека не се плаши да носи тешки одлуки.
На актуелниот Мундијал, пак, тој веќе ги судеше натпреварите Бразил – Мароко, Јордан – Алжир и осминафиналниот дуел меѓу Мексико и Еквадор.
Introducing your referee for the @FIFAWorldCup 2026 Final….🥁
Congratulations, Slavko Vinčić! 👏 pic.twitter.com/OMLJ3oA31p
— FIFA (@FIFAcom) July 17, 2026
Од инженер до финале на ЛШ, па до Мундијал
Малкумина знаат дека Винчиќ по професија е инженер по телекомуникации. Кариерата ја почнал како дополнителен судија во тимот на прославениот словенечки арбитер Дамир Скомина, а со текот на годините се проби меѓу најценетите европски судии.
Словенецот е интернационален судија на ФИФА од 2010 година, а европската јавност добро го памети по финалето на Лигата на шампионите во 2024 година, кога ја делеше правдата на дуелот меѓу Реал Мадрид и Борусија Дортмунд.
Претходно беше главен судија и на финалето во Лига Европа во 2022 година, а судеше и на Европските и на Светските првенства.
Во 2020 година се најде во полициска акција
Името на Винчиќ се најде во светските медиуми и во 2020 година, кога беше приведен за време на полициска акција во Босна и Херцеговина насочена кон криминална група поврзана со проституција и дрога.
Набргу беше ослободен, а истражните органи утврдија дека не бил поврзан со случајот и против него не беше поведена постапка. Самиот Винчиќ тогаш изјави дека се нашол „на погрешно место во погрешно време“.
На неделното финале ќе му асистираат неговите сонародници Томаж Кланчник и Андраж Ковачиќ, додека четврти судија ќе биде Јорданецот Адам Махадмех.