🎥 КОЈ Е 20-ГОДИШНИКОТ ШТО ПОЛНИ САЛИ НИЗ РЕГИОНОТ? Јаков Јозиновиќ: од Тик-Ток сензација до распродадени концерти и солзи во Скопје
Младиот пејач од Винковци ја освои публиката со кавери и емоции, па не беше изненадување кога на концертот во Скопје, стаписан пред распената публика и самиот вчудоневиден од својата слава, пушти и солзи
Јаков Јозиновиќ (20) е роден во Винковци и е нова музичка ѕвезда во Хрватска, но и во регионот. Сепак, не станал познат преку ноќ, туку го започнал своето музичко патување како 12-годишно дете во 2018 година, во шоуто „Звјездице“, каде што стигна до полуфиналето, а потоа во 2021 година стигна до полуфиналето во „Суперталент“.
Најголема популарност доби со своите преработки на безвременски хитови од Оливер Драгојевиќ, Здравко Чолиќ, Џибони и Ѓорѓе Балашевиќ, кои станаа вирални и имаат милиони прегледи на Тик-Ток, а потоа покажа дека е повеќе од минлива интернет сензација.
Иако долго време беше препознатлив по кавери, токму тоа се покажа како негов најсилен адут – способност да внесе нова емоција во веќе познати хитови.
Неговите концерти брзо почнаа да се распродаваат. Во Белград, на пример, повеќе настапи во Сава центар беа распродадени за рекордно кратко време, а интересот постојано расте.
Публиката не доаѓа само заради гласот – туку и заради атмосферата. Настапите на Јозиновиќ често личат на заедничко пеење, каде илјадници луѓе ги знаат песните од почеток до крај.
Во време кога музичката сцена постојано бара нови ѕвезди, ретко кој успева толку брзо да го освои регионот како Јаков Јозиновиќ.
Концертот во Скопје ја потврди неговата ѕвездена траекторија. Пред преполна сала, Јозиновиќ го одржа својот прв голем солистички настап во македонската престолнина – вечер исполнета со емоции, солзи и силна врска со публиката.
View this post on Instagram
На концертот, пејачот не успеа да ги задржи солзите – момент што брзо стана вирален на социјалните мрежи. Публиката пееше во еден глас, а атмосферата достигна кулминација со изведбите на безвременските хитови.
Дополнителна симболика на настапот му даде и посетата на спомен-куќата на Тоше Проески во Крушево – негов голем музички идол, од кого, како што самиот вели, научил не само за музиката, туку и за човечноста.
Непосредно пред концертот во Скопје, Јозиновиќ доби и поддршка од македонската музичка дива Калиопи, која му испрати симболичен подарок со порака за успех.
Во меѓувреме, тој веќе започнува нова фаза – со свои песни и сè поголеми настапи, меѓу кои и концерти во Виена и на фестивали низ регионот.
Приказната на Јаков Јозиновиќ е доказ дека новата генерација ѕвезди не мора да доаѓа по класични музички патишта. Понекогаш, доволни се глас, емоција и искреност – за да се стигне од Тик-Ток видеа до полни арени.