ЌЕ СВЕДОЧИ „НАЈЛОЈАЛНИОТ ПРИЈАТЕЛ“ НА ЕПСТИН Екс-сопственикот на „Викторијас Сикрет“ му дал полномошно на сексуаниот престапник?

Милијардерот Лес Векснер, човекот кој ја изгради империјата „Викторијас Сикрет“ и со години му доверуваше управување со своето богатство на сексуалниот престапник Џефри Епстин, утре ќе сведочи зад затворени врати пред Конгресот во Охајо.

Новообјавените документи за Епстин од Министерството за правда повторно ја отворија темата за нивната блиска и контроверзна врска.

Сослушувањето доаѓа по судска покана издадена од демократите во Комитетот за надзор и владини реформи на Претставничкиот дом. Векснер, 88-годишниот малопродажен магнат, најавил дека ќе соработува со истрагата.

„Толку болен и толку изопачен“

Во судските документи, Вирџинија Џуфре, една од најпознатите жртви на Епстин, тврди дека Векснер бил меѓу влијателните мажи што ги запознала преку финансиерот. Векснер постојано негира вмешаност или знаење за злосторствата и тврди дека никогаш не ја запознал Џуфре.

Во 2019 година им изјавил на инвеститорите дека се срами што некогаш бил близок со некој „толку болен, толку лукав, толку изопачен“.

Тој никогаш не бил обвинет за кривично дело.

Моќ, полномошно и проневери

Епстин го запознал Векснер околу 1986 година. За неколку години, Векснер му доверил управување со своето богатство и му дал полномошно во 1991 година.

Со тоа, Епстин можел да инвестира, да склучува зделки и да купува недвижнини во име на Векснер. Подоцна, односот завршил откако Векснер дознал дека биле проневерени средства.

Истражните белешки наведуваат дека во 2008 година Епстин вратил 100 милиони долари, за кои се верувало дека биле само дел од украдените средства.

„Никогаш не би го предал“

Во новообјавените документи се појавуваат лични белешки на Епстин, во кои тој пишува дека никогаш не направил нешто без да го информира Векснер и дека никогаш не би го предал.

Портпаролот на Векснер, Том Дејвис, изјави дека ваквите нацрти се дел од, како што рече, „лажни, бизарни и заблудни изјави“ на Епстин.

„Жал ми е, го прекршивте правилото бр.1“

Векснер тврдеше дека ги прекинал врските со Епстин во 2007 година. Сепак, новообјавените записи покажуваат дека контактот продолжил и по тој период.

Една електронска порака од јуни 2008 година покажува дека Векснер му напишал на Епстин по договорот за признавање вина во Флорида.

„Абигејл ми го кажа исходот… сè што можам да кажам е дека ми е жал. Го прекршивте вашето правило број 1… секогаш бидете дискретни“, се вели во пораката.

Епстин одговорил кратко:

„Нема изговор“.

Стари обвинувања, нови документи

Се смета дека новите објавени документи за Епстин ги охрабриле жртвите и повторно го зголемиле притисокот врз Векснер. Марија Фармер изјавила дека редигираниот извештај на ФБИ ги потврдува нејзините рани обвинувања против Епстин.

Иако Векснер не е обвинет, неговото име се појавува повеќе од илјада пати во досиејата, што дополнително го интензивира јавниот интерес.