ИСПУКАЛ ВО НЕА ТРИ КУРШУМИ, СЕ ВРАТИЛ И ПУКАЛ УШТЕ ЕДНАШ Ликвидирана жена во Ниш, ја убил кумот

Жителите на населбата Палилула во Ниш од утровово се потресени од грозоморното убиство на жената А.Ш. (44), која беше ликвидирана со огнено оружје веднаш пред нејзината семејна куќа. Осомничениот Д.Г. беше уапсен за нејзиното убиство неколку часа подоцна.

Несреќната жена го однела своето дете во градинка, а додека се враќала дома, напаѓачот ја чекал во заседа.

Според неофицијални извори, напаѓачот бил добро запознаен со движењата на жртвата. Кога А.Ш. влегла подлабоко во улицата, на пат кон дома, тој во неа испукал неколку истрели од пиштол. Безбедносните камери од блиската куќа наводно го снимиле инцидентот. Убиецот испукал неколку истрели, си заминал, а потоа се вратил и испукал уште еден, „контролен“ истрел, за да се увери дека жртвата е мртва.

Еден од соседите, кој бил на улицата во времето на пукањето, ги опишал сцените што ги видел.

– Слушнав истрели рано наутро, истрчав надвор и видов жена како лежи во локва крв. До неа стоеше маж со пиштол. Ме погледна и рече: „Нема тебе, бегај!“, а потоа исчезна во околните премини – изјавил соседот за српските медиуми.

Тој додал дека ги познава и жртвата и напаѓачот, а убиецот наводно ѝ бил кум на жртвата. Таа е поранешна ракометарка.

Според информациите од мештаните, А.Ш. живеела со својата мајка и со детето, откако се развела од сопругот Ѓорѓе М., кој, пак, загинал во експлозија во автомобил кратко време по разводот во 2017 година.

Веднаш по пријавувањето на злосторството, нишката полиција ги блокирала сите излези од градот и клучните патишта во населбата Палилула. На терен излегле силни полициски сили, форензички експерти и дежурниот обвинител на Вишото јавно обвинителство во Ниш.

Осомничениот за убиството е уапсен, а полицијата сè уште проверува дали имал соучесници или сведоци кои можеби учествувале во злосторството. Се проверуваат и снимките од безбедносните камери во областа. Мотивот и околностите на злосторството сè уште се истражуваат.

Истражните органи не ја исклучуваат можноста убиството да е резултат на нерасчистени сметки од минатото.

А.Ш. била сопруга на Ѓорѓе М., кој загина во декември 2017 година во нишката населба Дурлан, кога експлодирала импровизирана експлозивна направа.

– Ѓорѓе М. загина кога импровизирана експлозивна направа, што се обидел да ја постави под автомобил „Голф 5“ експлодирала во неговите раце. Истрагата во тоа време укажуваше дека тој бил оперативец во војната меѓу криминалните кланови што го потресуваше Ниш во тие години – изјавил извор близок до истрагата.

Телото на убиената жена е префрлено во Институтот за судска медицина на обдукција, а полицијата интензивно работи на расветлување на сите околности на злосторството.