„БЕЗБЕДЕН ГРАД“ Е ЗАКОН ЗА ЖИВОТ, А НЕ ЗА КАЗНИ Од Вреди уверуваат дека МВР ќе ги почитува јазичните права на граѓаните

Коалицијата Вреди ги повикува народните пратеници да го видат Законот за прекршоци надвор од дневната политика и да гласаат за граѓаните, за нивната безбедност и за животот, бидејќи безбедните патишта се заедничка одговорност и општ општествен интерес.

„Во исто време, сакаме јасно да нагласиме дека секој акт што ќе го издаде Министерството за внатрешни работи, без оглед на начинот на поднесување, ќе биде подготвен и доставен на јазикот утврден со Законот и со Уставот, гарантирајќи целосно почитување на јазичните права на граѓаните, вклучително и на албанскиот јазик“, се наведува во соопштението од Вреди.

Според коалицијата, системот „Безбеден град“ е прашање на јавна безбедност, на заштита на животите на граѓаните и на воспоставување ред во сообраќајот.

„Кога зборуваме за ‘Безбеден град’, не зборуваме за камери или за казни, туку за човечки животи. За побезбедни патишта, каде што никој не го губи својот татко, син или сестра поради туѓа неодговорност. За Вреди човечкиот живот нема цена и не може да се релативизира со политички пресметки или дневни интереси. Затоа, законот за имплементација на системот ‘Безбеден град’ сега влегува во собраниска процедура, како неопходен чекор кон зголемување на безбедноста на патиштата и заштита на граѓаните“, се наведува во соопштението од Вреди.