СИЉАНОВСКА-ДАВКОВА ЈА ДОДЕЛИ НАГРАДАТА ЗА АРХИТЕКТУРА ЗА 2025 ГОДИНА Носители се Искра и Владимир Лековски
Архитектите наградата ја добија за проектот Православен храм – црква „Св. Рамноапостоли цар Константин и царица Елена“ во Скопје.
Претседателката Гордана Сиљановска-Давкова синоќа ја врачи Големата годишна награда за најуспешно реализирано архитектонско дело во 2025 на авторите Искра Лековска и Владимир Лековски од архитектонското студио „Лелелеле“, за проектот Православен храм – црква „Св. Рамноапостоли цар Константин и царица Елена“ во Скопје.
-Големата годишна награда за архитектура не ја слави архитектурата само како ларпурлартизам, ниту само како очигледен резултат и творба, туку како процес на истражување, трагање, компарирање, сомневање, преиспитување и одговорност кон просторот и луѓето во него. Таа испраќа порака дека достоинството на архитектонската професија се гради врз креативен и етички идентитет, професионален интегритет и дигнитет, уметничка смелост и хуманистичка свесност – рече Сиљановска-Давкова на доделувањето.
Таа додаде дека наградата има силна, едукативна и инспиративна вредност за архитектонската фела и за младите архитекти.
-Улогата на архитектот денес е посложена и поважна од кога било. Во време на забрзана до забревтаност урбанизација, економска логика и притисоци, занемарен квалитет на живот, архитектот не е само проектант, туку и чувар и бранител на јавниот интерес и на просторот како заедничко добро, на рамнотежата меѓу потребите на денешницата и одговорноста кон иднината – рече Сиљановска-Давкова.
Таа рече и дека годинашната награда оди во вистински раце.
– Се уверив на дело и на самото место дека изборот на добитникот не е случаен, туку произлегува од студиозна, строга и одговорна евалуација на дела коишто не само што ги исполнуваат високите професионални стандарди, туку и ги надминуваат, поставувајќи нови критериуми и репери во современата архитектонска практика и реалност – рече претседателката на Македонија.