ПОСЛЕДНИТЕ ГОДИНИ ПРОГРАМАТА ЗАБАВИ, АМА СЕГА Е ДОБРО Агелер за реформите во секторот финансии со помош на Трезорот на САД

САД и Северна Македонија се обединети во многу нешта, вклучително и нашето уверување дека транспарентноста на институциите и силни економии се основа на успешна демократија, траен просперитет и безбедни заедници. Сакам да ја поздравам соработката меѓу САД и Северна Македонија во зајакнување на институциите, промовирање на економската соработка, и испорачување резултати за граѓаните.

Ова го порача американската амбасадорка во земјава Анџела Агелер на денешниот настан организиран од Министерството за финансии „Зајакнување на институционалните капацитети: Одбележување на соработката меѓу САД и Северна Македонија“.

-Оваа специјална програма меѓу Трезорот на САД и Владата на Северна Македонија, поконкретно Министерството за финансии, започна во 2022, но соработката започна многу порано. Денес оваа програма стана втора по големина на американското Министерство за финансии во светот. Напорите се насочени во пет критични области: Управата за јавни приходи, финансирање во инфраструктурата, банкарски и финансиски услуги, буџетска одговорност и борба против економскиот криминал – истакна Агелер.

Таа нагласи дека успехот на ова партнерство е сведоштво за нашите споделени заложби и отворена средина за соработка поттикната од Министерството за финансии.

– Министерке, програмата забави малку во последните неколку години, како што ние го оценивме од двете страни на Атлантикот влијанието и вистинскиот потенцијал на ова партнерство. Сакам лично да ви се заблагодарам за вашата непоколеблива заложба и поддршка за нејзино продолжување. Поради вас, ние градиме посилни институции, поефикасен фискален менаџмент и креирање појасни и пофер правила коишто им даваат доверба на бизнисите и инвеститорите да ја прошират дејноста – рече Агелер.

Американската амбасадорка посочи дека е-формите ќе помогнат во диференцирањето на финансиите, проширување на капиталните пазари и намалување на зависноста од надворешни долгови.

– Со работење заедно придонесуваме нашите земји да бидат побезбедни, посилни и попросперитетни. И исто така поставуваме основи за посветла иднина за идните генерации – заклучи Агелер.

Претходно министерката за финансии Гордана Димитриеска Кочоска истакна дека ова партнерство не е само поддршка, туку долгорочен процес на јакнење на институциите, зголемување на експертизата и создавање модерни системи кои ќе обезбедат предвидливи, одговорни и транспарентни јавни финансии.

-Последниот период соработката продолжува преку подготовка на подзаконски акти од Законот за буџети, нов формат на Буџетот, развивање мерливи индикатори за перформанси и натамошно консолидирање на главната книга како стратешка реформа за транспарентни јавни финанси. Управата за јавни приходи соработува со ОТА, заедно со тим од седум високоискусни советници во области поврзани се управување со проекти, управување со даночен долг, даночни контроли, а со тоа и избор на ризични даночни обврзници – рече Димитриеска Кочоска.

Таа, осврнувајќи се на соработката со Министерството за финансии на САД преку нивната Канцеларија за техничка помош (ОТА), рече дека соработката со Tрезорот на САД во делот на секторите Буџет и Трезор има длабоки корени и дека нашиот систем за буџетско планирање бил првично развиен со техничка помош од САД во периодот од 2004 до 2008 година и претставува основа врз која денес градиме современо управување со јавните финансии.