КОМЕНТАР СО ЕДЕН ЗБОР, АМА ОХРАБРУВАЧКИ „Продуктивно“ напиша руски преговарач по 5 часа разгледување на финалниот мировен предлог за Украина

Во Кремљ завршија долготрајните преговори меѓу рускиот претседател Владимир Путин и делегацијата на Соединетите Американски Држави, посветени на мировно решавање на војната во Украна.

Средбата траеше речиси пет часа, почнувајќи околу 19:40 часот по московско време во вторникот и завршувајќи во 00:30 часот по полноќ во средата, 3 декември,јави ТАСС.

Ова беше шеста средба на Путин со специјалниот пратеник на американскиот претседател, Стив Виткоф, кој и овој пат беше придружуван од Џаред Кушнер, зетот на американскиот претседател Доналд Трамп. Последен пат Виткоф се сретна со Путин во август, кога разговорите траеја околу три часа.

Од руската страна во преговорите, освен Путин, учествуваше и неговиот помошник Јуриј Ушаков и специјалниот претставник на претседателот и шеф на Рускиот фонд за директни инвестиции (РФПИ), Кирил Дмитриев.

Клучна тема на разговорите беше уредувањето на конфликтот во Украина и разгледувањето на мировниот план, кој беше првично изработен од САД, а потоа дополнително коригиран и ажуриран од Киев и неговите европски сојузници. За време на средбата, американските пратеници му го претставиле овој ажуриран мировен предлог на рускиот претседател.

По завршувањето на разговорите, Кирил Дмитриев на социјалната мрежа Икс (поранешен Твитер) кратко напиша: „Продуктивно“, сугерирајќи дека средбата поминала во конструктивна атмосфера.

Непосредно по напуштањето на Кремљ, специјалниот пратеник Виткоф веднаш се упати во амбасадата на САД во Москва.

Иако засега нема официјални изјави од учесниците, новинарите се собраа во Кремљ со очекување дека помошникот на рускиот претседател, Јуриј Ушаков, може да излезе со резиме од средбата.

Претходно, американското издание Аксиос објави дека по преговорите во Москва, Виткоф и Кушнер планираат да отпатуваат во една од европските земји за да се сретнат со украинскиот претседател Володимир Зеленски. Оваа најавена средба укажува на интензивна дипломатска активност во обид да се усогласат позициите меѓу Москва и Киев со посредство на Вашингтон.