ПОСЛЕДНИ ОБИДИ НА ЛЕКОРНУ ДА СОСТАВИ ВЛАДА Францускиот премиер во оставка бара излез од кризата

Францускиот премиер во заминување, Себастијан Лекорну, денеска започнува дводневни, последни консултации со претставници на различни политички партии — само еден ден по неговата неочекувана оставка — во обид да се најде излез од продлабочената политичка криза во земјата.
Лекорну поднесе оставка, заедно со целата своја влада, во понеделникот, откако кабинетот што го објави во неделата вечер беше одбиен и од сојузниците и од противниците. Со тоа, неговата влада стана најкраткотрајната во современата француска историја.
Претседателот Емануел Макрон вчера му довери на Лекорну да ги води разговорите со партиските лидери, поставувајќи краен рок до среда вечер.
Политичари од различни ориентации реагираа со збунетост и критики на потезите на претседателот. Дел од нив сметаат дека задачата што му е доделена на Лекорну е само обид на Макрон да добие дополнително време, речиси еден месец по неговата контроверзна номинација.
Во моментов не е јасно колкав ќе биде опсегот на одговорностите на Лекорну за време на овие консултации.
– Како и многу Французи, веќе не ги разбирам одлуките на претседателот – изјави Габриел Атал, центристички пратеник и поранешен премиер во владата на Макрон.
Лекорну утрово започна средби со претставници на конзервативните и централно-десничарските партии, меѓу кои и со претседателот на Сенатот, Жерар Ларшер, и претседателката на Националното собрание, Јаел Браун-Пивет.

СЕ НАЅИРА КРАЈОТ НА ЕРАТА НА МАКРОН Тој е ослабен лидер, а Франција тоне во политичка криза