ГЕРМАНСКИ РЕГУЛАТОР ЈА ТУЖИ КОМПАНИЈАТА МОНДЕЛЕЗ Ја намалила грамажата на чоколадите „Милка“ без да ја намали цената

Германскиот регулатор за заштита на потрошувачите поднесе тужба против компанијата „Монделез“, во ккоја го обвинува дека го намалил пакувањето на чоколадните плочки „Милка“ од 100 на 90 грама, но не и нивната цена.

Регионалниот суд во Бремен потврди за медиумите дека тужбата ја поднело здружението за заштита на потрошувачите во Хамбург.

– Многу потрошувачи со години купуваат „Милка“ во исто пакување и претпоставуваат дека масата на производот не се променила. Тие се жртви на  измама бидејќи повеќето варијации на чоколадото сега тежат само 90 грама, а нивната цена е иста или дури и повисока – изјави Армин Валет од здружението.

Намалувањето е речиси незабележливо, па самото чоколадо е за милиметар потенко, со ист дизајн и пакување. Новата маса е прикажана на предната страна од пакувањето, но во многу случаи е наведена со ситни букви и е замаглена на полиците во супермаркетите.

Регулаторот бара појасни етикети и предупредување до потрошувачите дека пакувањето е намалено за најмалку шест мерки пред промената.

„Монделез“ ги отфрли тврдењата на здружението, велејќи дека транспарентноста во комуникацијата со потрошувачите е нивен врвен приоритет.

– Новата тежина е јасно наведена на пакувањето на производот – изјави портпаролката на компанијата, додавајќи дека „Монделез“ ги информирал клиентите на социјалните медиуми и дека целосен преглед на големините и тежините на производите е достапен онлајн.

Компанијата немала избор и била принудена да ја промени грамажата поради повисоките трошоци во синџирот на снабдување и состојките – додаде портпаролката, истакнувајќи дека цените на какаото речиси се зголемиле тројно во изминатата година и достигнале рекордни нивоа.

Судот ќе му даде можност на „Монделез“ да одговори на тужбата пред да одлучи дали да свика рочиште.