ВО КАВАДАРЦИ И ВО ВЕЛЕС ИЗМЕРЕНИ БЛИЗУ 43 СТЕПЕНИ Црвен аларм насекаде, екстремните температури ќе траат до сабота
Во Кавадарци денеска во 17 часот е измерена максимална температура од 42,7 степени, во Велес 42,6 степени, а во Демир Капија 42,4 степени. Според УХМР, во Скопје-Зајчев Рид и во Гевгелија се измерени 41,1 степени. Над 40 се измерени и во Битола, Штип (40,5), Струмица (40,5) и во Скопје-Петровец (40,8).
Топлинскиот бран што трае во македонија денеска донесе екстремни температури над 40 степени Целзиусови во повеќе градови во Македонија. УХМР и за утре издаде црвен аларм за екстремно топло време.
Во Кавадарци денеска во 17 часот е измерена максимална температура од 42,7 степени, во Велес 42,6 степени, а во Демир Капија 42,4 степени. Според УХМР, во Скопје-Зајчев Рид и во Гевгелија се измерени 41,1 степени. Над 40 се измерени и во Битола, Штип (40,5), Струмица (40,5) и во Скопје-Петровец (40,8).
И утре времето ќе биде сончево и многу топло со мала до умерена локална облачност. Ќе дува слаб до умерен ветер од променлив правец. Во Скопје ќе биде сончево и многу топло со слаб до умерен ветер од северозападен правец.
Максималната температура ќе достигне 41 степен во Скопје, Гевгелија, Велес и во Демир Капија.
Од Управата за хидрометеоролошки работи најавуваат дека времето во следните денови, до сабота, 26 јули, ќе се задржи сончево и многу топло, со мала до умерена локална облачност.
Дневната температура наместа ќе надминува 40 степени и насекаде ќе биде над просекот за месец јули. Во недела ќе има локална појава на нестабилност со пороен дожд и грмежи, а дневната температура ќе биде во опаѓање.
Попрецизно, додека трае топлинскиот бран, дневната температура во југозападниот, источниот и североисточниот регион ќе се движи од 34 до 38 степени, а во полошкиот регион од 32 до 38 степени. Најтопло ќе биде во Пелагонија, во скопскиот, вардарскиот и во југоисточиот регион, каде температурата преку ден ќе се движи во висок интервал од 38 до 42 степени Целзиусови.
Алармите за предупредување на населението од временски непогоди се издаваат во жолта, портокалова и во црвена боја и се дел од системот за метеопредупредувања во Европа. Жолт аларм значи умерена опасност од временските прилики, со можност за умерени последици по околината, портокалов значи дека опасноста е голема, а црвениот аларм предупредува за екстремна опасност, со можност за катастрофални последици по луѓето, нивните имоти и по околината. Алармите се издаваат за различни временски прилики и појави: за ветер, дожд, горештина, студ, снег, мраз, грмотевици, крајбрежни настани, шумски пожари, лавини, поплави, порои, опасности на море и за суша.