ДАЛИ ЕВРОТО Е ПОПРИРОДЕН ПАРТНЕР НА ГРИВНАТА? Доларот нема да биде референтна валута во Украина
Гувернерот на Националната банка на Украина предупреди дека станува збор за „сложен и повеќеслоен процес“, кој бара темелна анализа и внимателно спроведување.
Украина наскоро би можела да направи една од најзначајните економски промени во својата понова историја: еврото би можело да стане новата референтна валута наместо американскиот долар, кој ја држеше таа позиција со децении.
Веста ја потврди гувернерот на Националната банка на Украина, Андриј Пишни истакнувајќи дека овој потег се разгледува во контекст на продлабочување на односите со Европската Унија, како и поради зголемената нестабилност на глобалните пазари.
– Потенцијалното членство во ЕУ, улогата на Европа во нашата одбрана и економската фрагментација во светот – сето ова нè тера да се запрашаме: дали еврото е всушност поприроден партнер за нашата гривна отколку доларот? – рече Пишни.
Таквата промена, иако техничка, би имала силна политичка симболика: преминот од доларот во еврото наспроти националната валута би бил еден од конкретните потези кон идна интеграција со Европската Унија – дури и пред самото членство.
Пишни предупреди дека станува збор за „сложен и повеќеслоен процес“, кој бара темелна анализа и внимателно спроведување.
Во секој случај, префрлањето на еврото како референтна валута ќе биде јасен сигнал за тоа каде Украина ја гледа својата иднина – веќе не меѓу Истокот и Западот, туку цврсто во европската економска орбита.