ЦРН ЧАД НАД ВАТИКАН Не е избран нов папа
Собраните мораа да бидат трпеливи бидејќи помина повеќе време од очекуваното да се појави чадот, повеќе од три часа од почетокот на конклавата.
Црн чад се издигна од оџакот на Систинската капела, сигнализирајќи дека првото гласање на кардиналите, собрани во конклава за избор на нов поглавар на Римокатоличката црква, заврши без резултат.
Илјадници верници собрани на плоштадот „Свети Петар“ го очекуваа чадот од тесниот оџак на покривот на капелата по ден исполнет со ритуали и церемонии, додека кардиналите се молеа за божествено водство во тајното гласање.
Повеќе од две недели по смртта на папата Франциско, 133 кардинали во Сикстинската капела ја почнаа денеска конклавата за избор на нов поглавар на Римокатоличката црква, која може да трае со часови, денови, па дури и со месеци.
Со кардинали од 70 земји од пет континенти, оваа конклава е најголемата некогаш организирана.
Ројтерс пренесува дека собраните морале да бидат трпеливи бидејќи поминало повеќе време од очекуваното да се појави чадот, повеќе од три часа од почетокот на конклавата.
Тоа е еден час повеќе отколку што било потребно за да се види чад по првото гласање на конклавата во 2013 на која беше избран покојниот папа Франциско.
Кога ќе се избере папа, ќе се појави бел чад, но не се очекуваше тоа да се случи денес – папата во модерно време никогаш не бил избран на првиот ден на конклавата.
Нема јасен фаворит, иако се смета дека италијанскиот кардинал Пјетро Паролин и филипинскиот кардинал Луис Антонио Тегле имаат најголеми шанси.
Папата Франциско, роден како Хорхе Марио Бергољо во Буенос Аирес во Аргентина, почна на Велики понеделник, 21 април 2025 година, во 88 година од животот, во својата резиденција во Ватикан.