ТРАМП ЈА НАРЕЧЕ ПРЕСУДАТА ЗА ЛЕ ПЕН ЛОВ НА ВЕШТЕРКИ Шефот на САД застана зад француската опозиционерка

Американскиот претседател Доналд Трамп го нарече случајот против француската опозиционерка Марин Ле Пен „лов на вештерки“ и ја пофали лидерката на крајната десница.

„Таа претрпе загуби, но продолжи, а сега, непосредно пред нешто што би било голема победа, ја фаќаат со помал прекршок за кој веројатно и не знаела. Мене тоа ми звучи како книговодствена грешка“, вели Трамп во објавата на неговата социјална мрежа „Truth Social“.

Пресудата на францускиот суд претставува пречка за 56-годишната Ле Пен. До нејзиното осудување, таа беше фаворит во анкетите пред претседателските избори во 2027 година.

Судот во Париз ја осуди Ле Пен и дваесетина луѓе од нејзината партија Национален собир (RN) за пренасочување односно проневера на средства од Европската унија. Со пресудата ѝ се забранува да извршува јавни функции во наредните 5 години со што та нема да може да учествува во претседателската трка во Франција во 2027 година, иако засега води на анкетите.

Трамп ја спореди ситуацијата на Ле Пен со неговата.

Американскиот претседател е осуден за фалсификување деловни документи за да ѝ исплати на порно ѕвезда во замена за нејзиното молчење за нивната сексуална врска уште пред да ја најави својата претседателска кандидатура во 2016 година, за обид да ги поништи резултатите од претседателските избори во 2020 година и за задржување доверливи документи по завршувањето на неговиот прв мандат.

Тој беше прогласен за виновен во случајот за фалсификување деловни книги. Во сите случаи, кои ги нарече политички мотивирани, ја негираше вината.

Федералните обвиненија против него беа отфрлени откако тој победи на изборите во 2024 година.

„Сево ова е многу лошо за Франција“, додаде Трамп во својата објава.