6 МАКЕДОНСКИ БАНКИ ВО НАЈГОЛЕМИТЕ 100 ВО ЈУГОИСТОЧНА ЕВРОПА Најдобро рангирана е Комерцијална банка

Шест македонски банки се во друштвото на стоте најголеми во Југоисточна Европа според активата за 2023 година. Најдобро рангирана е Комерцијална банка, а првпат на листата е Прокредит банка.

На првата позиција повторно е романската Банка Трансилванија, чии вкупни средства за една година се зголемиле 20,8 процени и надминуваат 32,5 милијарди евра. Во рангирањето што го прави SeeNews, најмногу банки, 17, се токму од Романија.

Во првата половина од SEE TOP 100 banks листата се две наши банки. Најголемата и најстарата. И двете го имаат подобрено пласманот за едно место. Комерцијална банка од 46. во 2022 на 45. во 2023 година, а Стопанска банка Скопје од 51. на 50. место.

Активата на Комерцијална банка, која на домашен терен е и најпрофитабилна, изнесува 2,66 милијарди евра и бележи годишен раст од 8,37 проценти. Вкупните средства на скопската Стопанска банка за минатата година се 2,13 милијарди евра.

Зголемување од 2,97 проценти има кај активата на НЛБ банка, а вредноста е 1,9 милијарди евра. Тоа ја рангира на 54. позиција, на која била и во 2022 година.

За пет места напредувале Халк банка и Шпаркасе банка. Првата од 67. на 62. место, а другата од 69. на 64. место. Халк располага со средства во вкупен обем од 1,59 милијарди евра, при годишен раст од 16,9 проценти. Кај Шпаркасе банка зголемувањето е за 13,28 насто и на крајот од 2023 година имала актива од 1,53 милијарди евра.

Меѓу најголемите банки од ЈИЕ годинава има четири нови – се вброи и Прокредит банка, чија актива е 809 милиони евра. Регистрирана е годишна промена од 17,66 насто.

За да се добие претстава за тоа кој е кој на банкарскиот простор во ЈИЕ, порталот Пари ги анализира податоците од рангирањето на SeeNews. Во топ 10 најголеми се четири романски, три бугарски, две хрватски и една словенечка банка.

Деталната анализа може да ја прочитате на следниот ЛИНК.