СО ЗЕЛКА ИЛИ СО ЛУТИ ПИПЕРКИ? Спорот за донер ќебапот меѓу Турција и Германија стигна до ЕУ

Европската комисија (ЕК) им даде на Турција и Германија рок од 6 месеци да постигнат компромис околу спорот за донер ќебапот, објавува британскиот магазин „Економист“.

Турција побара од Европската Унија заштитен статус за донер ќебапот бидејќи рецептот на ова популарно јадење во Германија значително се разликува од традиционалната варијанта.

Донер ќебапот се појави во Германија во 1970-те кога во земјата пристигнаа голем број работници од Турција.

Класичниот рецепт, кој Турција сака да го заштити, вклучува месо, ориз, домати и лути пиперки, кои се сервираат во пита леб.

Во Европа, донер ќебапот најчесто вклучува зелка, зелена салата и сосови, вклучувајќи и лук, и се завиткува во лаваш.

Поради овие разлики, Турција побара поддршка од ЕУ за заштита на традиционалниот начин на подготвување, според „Економист“. Турските барања вклучуваат користење говедско или пилешко месо, како и специфичен начин на маринирање и сечење на месото.

Продажбата на донер ќебап во Европа изнесува околу 3,5 милијарди евра годишно, од кои 2,3 милијарди евра се во Германија.

Ако Турција го добие правото да го заштити традиционалното име, донер ќебапот ќе мора да се продава под друго име во Европа.

Цената на донер ќебапот во Европа значително се зголеми, достигнувајќи околу 10 евра од порција.

Зборот „донер“ потекнува од турскиот глагол „донмек“, што значи „врти“. Јадењето се пече на вертикален шиш (ражен) и се сече на ленти кога месото ќе стане крцкаво и кафено.