📷 СТРАШНА ГЛЕТКА НА ПЛАЖА ВО ШКОТСКА 77 китови се насукаа на брегот и угинаа

Едно од најголемите масовни насукувања се случи на плажа во Оркни, Шкотска, кога 77  китови умреа откако беа исфрлени на брегот.

Британските нуркачи и спасувачи на морски животни (BDMLR) пронајдоа 12 животни на плажата Треснес на островот Сендеј, кои сè уште биле живи кога излегле од водата. Сепак, одлучено е да им биде извршена еутаназија по неуспешните обиди да ги вратат во водата.

Во групата од 77 животни имало мажјаци долги и до седум метри, но и женки и млади.

Експертите велат дека е премногу рано да се знае што го предизвикало насукувањето, но веројатно еден од китовите се нашол во неволја, а останатите се обиделе да помогнат, поради што тргнале по него.

Надлежните апелираа до граѓаните да се држат настрана од областа додека се врши обдукцијата.

Овој настан го претставува најголемото масовно насукување во Шкотска од 1995 година, иако слични заглавувања се забележани во последните години, пишува Би-Би-Си.

Минатата година, цела група од 55 китови загинаа откако се насукаа на островот Луис. Само 15 китови биле живи кога водата ги исфрлила на брегот. Едниот успеал да се врати во морето, додека другите морале да бидат еутаназирани.

Помеѓу 60-70 животни заглавиле во плитките води во Сатерленд во 2011 година.

Според Природонаучниот музеј, најголемото насукување на брегот на Велика Британија се случило во 1927 година кога 126 од повеќе од 130 китови убијци умреле во Дорнох Фирт во Хајленд.

Експерти од BDMLR, шкотската SPCA и морски ветеринари од Шкотска отпатувале во Оркни за да проценат дали некој од китовите може да се спаси. Областа била отсечена од плимата и осеката, а песокот на плажата каде што се насукале китовите бил премногу мек за да им дозволи на цицачите да се исправат.

Китовите морале да бидат вратени во исправена положба што е можно поскоро за да имаат каква било шанса да бидат спасени. Но, поради мекиот песок китовите паднале назад кога спасувачите се обиделе да ги исправат.