И ЗА ДУИ КОВАЧЕВСКИ Е САМО ПРИВРЕМЕН ПРЕМИЕР Стоилковски од ВМРО-ДПМНЕ за најавите дека наскоро ќе имаме премиер-Албанец
Тој премиер за кој зборува Османи ќе биде само продолжение на процесот на дуизација на институциите, кои и меѓународната заедница ги оцени како корумпирани – рече Стоилковски.
ДУИ му ги брои месеците на Димитар Ковачевски, кој сите го гледаат како привремен премиер, а тој премиер за кој зборува Бујар Османи ќе биде само продолжение на процесот на дуизација на институциите кои и меѓународната заедница ги оцени како корумпирани – изјави денеска портпаролот на ВМРО-ДПМНЕ Наум Стоилковски на новинарско прашање за изјавата на Османи дека наскоро ќе имаме премиер-Албанец.
Стоилковски нагласи дека не само што голем дел од јавноста го перцепира Ковачевски како нелегитимен премиер, туку и коалициските партнери во владата го гледаат само како привремен премиер кој наскоро ќе биде сменет.
– Привремен премиер на кого ДУИ му ги брои месеците пред да го сменат, без авторитет ниту во државата ниту од министрите во владата. Премиерот што го најавува Османи е продолжение на процесот на дуизација на институциите од меѓународната заедница оценети како корумпирани – рече Стоилковски.
Тој на истата прес конференција го повика Оливер Спасовски да не се крие зад флоскули на Фејсбук и да одговори колку криминалци со досие добиле дозвола за оружје.
– Дали Каришиќ со комисијата составена од Оливер Спасовски дал одобрение за оружје за Шукри Асани, лице со досие, осомничен за транспорт на кокаин, член на криминалната група од Грчец, меѓу првите десет за проверка во Скопје? Чуму листа на криминалци со досиеја за тежок криминал, чуму проверки, покривање, следење и обработка, чуму план „Безбеден град“, ако Каришиќ со комисијата на Спасовски им дава дозвола за оружје? Колку криминалци со досие добиле дозвола за оружје од комисија составена од Оливер Спасовски? Ова се прашања коишто не смеат да се игнорираат – изјави Стоилковски.