ДИШЕЊЕТО ГИ УБИВА Индијците живеат девет години помалку поради загадениот воздух

Животниот век на околу 40 отсто од Индијците најверојатно ќе биде пократок за повеќе од 9 години поради загадување на воздухот, се наведува во најновата студија на Институтот за енергетска политика на Универзитетот во Чикаго.

„Повеќе од 480 милиони луѓе кои живеат во огромни делови на централна, источна и северна Индија, вклучително и главниот град Њу Делхи, страдаат од значително високо ниво на загаденост“, наведува Универзитетот.

Според истражувачите, посебно загрижува што високото ниво на загаденост на воздухот во Индија географски се прошири со текот на времето, а како пример се наведува влошената состојба во западната држава Махараштри и во централната држава Маџа Прадеш.

Во 2020 година, Њу Делхи третпат по ред, беше најзагадениот главен град во светот според швајцарска организација „АјКјуЕр“ (IQAir), која го мери нивото на квалитетот на воздухот врз основа на концентрацијата на честички во воздухот што ги оштетуваат белите дробови, познато како ПМ 2,5.

Индија во 2019 година почна Националната програма за чист воздух на Индија со цел да го запре опасното загадување. Во извештајот на Универзитетот во Чикаго, се наведува дека „постигнувањето и одржувањето“ на целите на Националната програма, ќе го зголеми вкупниот животен век на земјата за 1,7 години, а во Њу Делхи до 3,1 години.

Целта на Институтот за енергетска политика е да го намали загадувањето во 102 најтешко погодените градови за 20-30 проценти до 2024 година, преку намалување на индустриските емисии и емисии на возила, како и воведување строги правила за транспорт на гориво и согорување на биомаса и намалување на загадувањето од прашина.

Според нивните наоди, соседен Бангладеш исто така може да го зголеми животниот век за 5,4 години доколку земјата го подобри квалитетот на воздухот до нивото препорачано од Светската здравствена организација.