Кога стоматолог и професор по кларинет ќе станат пивомајстори…
Сигурно сте ја слушнале онаа поговорка дека, ако ја изберете професијата што ја сакате, повеќе никогаш во животот нема да мора да работите. Токму така се чувствува и нашиот соговорник Горан Бакревски, кој почнал како стоматолог со хоби пиварство, а сега е пивар со хоби - стоматологија и е вистински среќен мајстор за пиво, работа која ја започнал неговиот брат Марјан, инаку, професор по кларинет.
Горан Бакревски го запознавме на настанот во Битола на кој беа поканети млади луѓе кои имале идеја за стартап бизниси и наместо да заминат како многумина други, одлучиле да работат и да останат во родниот град. Тој и неговиот брат Марјан Бакревски, иако се едуцирале за сосема други професии, се нашле себеси токму во оваа – пиварството.
Браќата Бакревски се сопственици на првата Крафт пиварница во Битола, а нивното пиво „Бак“, чие име е едноставна кратенка од нивното презиме, го пробавме на самиот извор, во Битола и одлично ни легна, прво светлото, а потоа и темното кое, како што подоцна не информираше пивомајсторот, на наше изненадување, имало помалку алкохол од светлото и беше изненадувачки лесно за пиење.
Ако се водиме по дефиницијата на американското здружение на мали независни пиварници која вели дека пивото на етикетата може да го носи називот Крафт ако 80 проценти од сопствеништвото на фирмата е во рацете на мајсторот пивар и дека ниту еден процент не смее да биде во сопственост на мултикомпанија, тогаш нема дилеми дека „Бак“ е токму такво – занаетчиско пиво, со тоа што тука наместо еден, имаме двајца мајстори.
Целиот текст прочитајте го на порталот „Арт кујна“.