📷 ЖЕНА ПОВРЕДЕНА ОД НЕВРЕМЕТО ВО СКОПЈЕ Во Карпош се расчистуваат паднатите дрвја по силниот ветер
Општинските екипи интервенираа на повеќе локации, отстранети се опасностите, а службите остануваат на терен по силниот ветер што го зафати Скопје.
Силниот ветер што вечерва го зафати Скопје предизвика проблеми и на територијата на Општина Карпош, каде се регистрирани паднати дрвја на јавни површини и улици, како и оштетување на електричен кабел.
Од Општина Карпош информираат дека при еден од инцидентите била повредена граѓанка, на која веднаш ѝ била укажана соодветна медицинска помош.
„Во тек сме со случувањата и нејзината здравствена состојба преку надлежните служби“, посочуваат општината.
Општинските екипи веднаш излегле на терен и интервенирале на неколку критични точки. Расчистени се паднати дрвја на улиците Јуриј Гагарин, Драгиша Мишовиќ, како и на плоштадот „Делфина“.
Дополнително, на улицата Каирска бр. 43 бил отстранет скинат електричен кабел, со што била елиминирана потенцијална опасност за граѓаните.
Од Општина Карпош информираат дека во моментов нема опасност за жителите, а сите критични локации се расчистени.
„Општинските служби и понатаму се на терен и подготвени се да интервенираат каде што е потребно“, велат од Општина Карпош.