Заев за Николоски: Тој ќе зборува за чушки и френки, ќе го згазам во Струмица

Убаво е да ги знаете луѓето кои ќе се борат за Охрид и за Петата изборна единица, рече лидерот на СДСМ Зоран Заев претставувајќи ги кандидатите за пратеници од „Петката“ на граѓанската трибина во Охрид:

– Туку да ве прашам охриѓани што бара вашиот охриѓанец којшто живее во Скопје да носи листа во Петата изборна единица. Заемислете дојде човек од Охрид којшто треба да зборува за чушки и френки во Струмица, за вино во Кавадарци. Замислете дојде човек којшто22 години откако заврши факултет влезе во парламентот и не може два збора да каже што направил за Охрид и за цела Македонија. Сега дојде во Струмица да се натпреваруваме. Да знаете немојте лично да ме сватите ќе го згазам во Струмица, ќе го поразиме толку силно зашто е нечесно толку силно да го понижуваш нашиот народ. Тој беше десната рака на Груевски. Цело време е во политиката, што доби Охрид од него. Тоа покажува колку се несериозни – рече Заев.

Тој најави нов концепт, со нова програма и над се нова македонска развојна економија.

– Ќе одржиме економски лекции и на Мицкоски и на неговите економски кадри, но и лекции на регионот. Затоа што имаме потенцијал, одлична географска поставеност, работлив народ, луѓе кои не се штедат само бараат фер-шанса чесно да заработат. Но и затоа што сега имаме пријатели, а не непријатели, и затоа што не почитува целиот свет. Затоа ќе успееме – истакна Заев.

Презентирајќи ја економската програма на коалицијата предводена од СДСМ на престојните предвремени парламентарни избори, Заев рече дека таа нуди реална можност за освојување 80 отсто од поглавјата за членество во ЕУ.

– Европеизацијата значи екологија, значи правда, значи подобро здравство, подобра социјална заштита, значи подобра економија, култура. Затоа тежнееме кон Европа. Затоа носевме храбри одлуки…Секое поглавје значи нови фондови, секој кластер од поглавјата значи рамноправност во трошењето европски пари. Затоа со СДСМ за четири години 80 отсто од отворање на фондовите на ЕУ, за шест години ќе бидеме членка на ЕУ – рече тој.

Лидерот на СДСМ ја нагласи одлучноста на партијата да гради фер општество за сите, дури и во време кога се решаваа најтешките прашања во историјата на Македонија од осамостојувањето досега, и тоа како што истакна „без калкулации, без криење“.

– Влеговме во костец со проблемот, го решивме и отворивме фронтот за развој, и на земјата и на народот им оставивме перспектива за напредок. Членството во НАТО значи целовитост и територијален интегритет, стабилност на границите и испорачуваме стаболност во регионот. Имаме држава признаена во целиот свет, во која живеат доминантно Македонци со признаен идентите, кои зборуваат македонски јазик. Носевме одлуки без било какви калкулации. Сега останува на граѓаните да носат одлуки, ќе се враќаме во „обновата“, „преродбата“ на режимот или ќе одиме напред, кон евроатлантската пeрспектива, де живееме со европските стандард, да си ја европеизираме државата или повторно ќе влеземе во кавги меѓусебе и со соседите – рече Заев.

Лидерот на СДСМ укажа и на вложувањата на локалната и централната власт во Охрид во последните три години, споредувајќи го направеното со она во време кога и локлната и централната власт беше кај опозициската ВМРО-ДПМНЕ.

– Една милијарда денари директна помош кон Охрид, преку „Проаква“ и Колекторот. Шеф на опозиција бев, ги молев одовде од плоштадот во Охрид, помогнете му на Охрид, опозицијата стои зад вас, ослободете ги сметките, пуштете им пари. Воопшто не им беше грижа, нивен градоначалник, нивна централна власт. Ние се гордееме со тоа што сме го сработиле со Охрид, да не ги повторувам сите други капитални зданија и проекти што  ги завршивме заедно и централната и локалната власт и затоа сме денес овде исправени и среќни чекајќи поддршка и барајќи глас од охриѓани да дадат поддршка да продолжиме – посочи Заев.

Тој ги повика граѓаните на Охрид да изберат на 15 јули, своите гласови да ги дадат за инвестиции во луѓе, не во споменици, инвестиции во природните реткоски и убавини, а не во фасади, стиропор, инвестиции во младите, во иднината…

– Лесно е да се избере, определбата треба да е јасна како бел ден, за извесна иднина на државата, избор за сигурност, не за опаснот, за иднина, за извесност, а не за ризик. Гласање за Охрид, гласање за сите нас – рече лидерот на СДСМ.

Пред Охриѓани свои обраќања имаа и носителот на Листата на Коалицијата на СДСМ за 5 Изборна единица Радмила Шекеринска, како и кандидатот за пратеник од Охрид Лазе Танески.