Вработени во МВР се позитивни на коронавирусот

Неколкумина вработени во Министерството за внатрешни работи (МВР) се позитивни на коронавирусот, соопшти министерот за здравство Венко Филипче на денешната прес-конференција.

– Денеска пристигна информација дека во една од единиците во МВР има заболени со ковид-19. Нивните првични контакти се веќе анализирани и издадени се решенија за изолација. Преземени се сите мерки од страна на епидемиолозите – рече Филипче, но не прецизираше колку точно полицајци се заразени.

На почетокот на прес-конференцијата, министерот соопшти дека денеска се оздравени 50 пациенти, но дека има двајца починати – еден пациент од Скопје на 78-годишна возраст и еден пациент од Тетово на 77-годишна возраст. Во измиантите 24 часа, додаде тој, направени биле 553 тестирања, а имало 22 заразени. Вкупната бројка на заразени, рече Филипче сега изнесува 1.839 пациенти, оздравени се 1.351, починати се 106, а активнии се 389 пациенти.