ВМРО-ДПМНЕ му одговори на СДСМ: Единствената средба за којашто знаеме е таа на Заев и Мијалков

Единствената средба за која знаеме е таа на Заев со Мијалков, каде Заев му ветуваше слобода, за возврат бараше креирање на проблеми во ВМРО-ДПМНЕ, возврати опозициската ВМРО-ДПМНЕ, откако партијата на Зоран Заев денеска преку соопштение постави прашање дали Мицкоски во изминатите недели се сретнувал со Сашо Мијалков во хотелот „Мериот“.

„А ако СДСМ има нешто против меѓународната заедница и Шведска нека каже. Настанот во хотелот Мериот е организиран од страна на шведската фондација Јарл Халмарсон, која ја поддржува ВМРО-ДПМНЕ и помага при градење на кадри и политики, доколку СДСМ има проблем со тоа нека каже. СДСМ не треба да заборави дека Сашо Мијалков е таму каде што е заради притисокот на ВМРО, народот и меѓународната заедница. Да се прашуваше Зоран Заев, Сашо Мијалков сè уште ќе беше на слобода и сега заедно ќе правеа вештачки кризи во ВМРО-ДПМНЕ, за да ја спасат фотелјата на Заев и да ја купат слободата на Мијалков. Криминалот повеќе не поминува. Одговорност ќе има. Во СДСМ тоа го знаат и затоа се нервозни“, наведено е во соопштението на ВМРО-ДПМНЕ.