Владата одобри набавка на лекот „ремдесивир“ прифатен во терапијата за ковид-19
Задолжен е министерот за здравство да го потпише и да го имплементира посебниот договор за јавна набавка на овој лек.
Владата на денешната 16-та редовна седница ја разгледа информацијата за јавна набавка на лекот „ремдесивир“ (Veklury), прифатен во терапијата на ковид-19 и донесе заклучок да го задолжи министерот за здравство да го потпише и имплементира посебниот договор за јавна набавка на тој лек.
Со вториот заклучок во врска со оваа информација, како што соошти владината прес-служба, Владата го задолжи Министерството за финансии да обезбеди во рамките на буџетот на Министерството за здравство за 2020 година, дополнителни 13.500.000 денари, за плаќање на лекот „Veklury (remdesivir)“ за месец октомври, додека останатите средства во износ од 67.500.000 денари, за исплата по сукцесивна испорака на овој лек за период од пет месеци, да се предвидат и обезбедат во буџетот на Министерството за здравство за 2021 година.
На денешната седница Владата ја прифати препораката на Комисијата за заразни болести да го одобри Општиот протокол за организирање на спортски натпревари во услови на пандемија со ковид-19, со цел спречување на ширење на коронавирусот меѓу спортисти, спортски работници, службени лица и сите останати лица вклучени во одигрување и организација на натпреварите.